Փոխվարչապետի կարիք ծագում է միայն այն դեպքում, երբ պետք է կանոնակարգել գործադիրի աշխատանքը, օրինակ՝ երբ վարչապետը մեկնում է մի տեղ, և փոխվարչապետը պետք է փոխարինի վարչապետին:
Ինչպես «Առաջին լրատվական»-ի հետ զրույցում հայտնեց ԱԺ պատգամավոր, նախկին վարչապետ Հրանտ Բագրատյանը, եթե այդ տեսակետից ենք մոտենում, ապա սահմանադրության փոփոխության կարիք չկա, և հավանաբար կառավարության գործունեության կանոնակարգով կարելի էր կարգավորել այդ խնդիրը:
«Բայց այսօր փոխվարչապետի պաշտոնն ուզում են դարձնել քաղաքական պաշտոն: Դա արդեն քաղաքական հարց է, տնտեսական տրամանաբանության հարց չէ: Տրամաբանորեն չպետք է լինի, կառավարման տեսակետից դրա կարիքը չկա: Քաղաքական քայլ է, և քաղաքական ուժերը կարծում են, որ իրենք փոխվարչապետի հաստիքի կարիքն ունեն»,- ասաց Հ.Բագրատյանը:
Հարցին՝ կարելի՞ է ենթադրել, որ այդ հարցով սահմանադրական հանրաքվեն բանակցային որոշ գործընթացների արդյունք է, Հ.Բագրատյանը պատասխանեց. «Չգիտեմ: Ինձ հետաքրքրում է իմ անելիքը, ուրիշների անելիքների մեկնաբանությամբ ես չեմ զբաղվում»:
Հիշեցնենք, որ ԱԺ նախագահ Հովիկ Աբրահամյանն օրերս ասուլիսի ժամանակ հաստատեց, որ նախագահական ընտրությունների հետ միաժամանակ սահմանադրական հանրաքվե անցկացնելու նախապատրաստական աշխատանքներ են տարվում: Տարածված լուրերի համաձայն՝ առավել լայն լիազորություններով օժտված այս պաշտոնը ստեղծվում է ԲՀԿ առաջնորդ Գագիկ Ծառուկյանի համար, որը դրա փոխարեն առաջիկա ընտրություններում չի առաջադրվելու և սատարելու է Սերժ Սարգսյանին:
