Թուրքական Zaman թերթը հաղորդում է, որ վարչապետ Էրդողանի ռուսաստանյան այցից առաջ 200 թուրք գործարարների հետ Մոսկվա է մեկնել արտաքին առևտրի գծով պետնախարար Զաֆեր Չաղլայանը:
Մոսկվայի «Ուկրաինա» հյուրանոցում մոսկովյան գործարարների հետ հանդիպման ժամանակ Չաղլայանը նշել է. «Երկու երկրների միջև Բարձր մակարդակի համագործակցության խորհրդի (ÜDİK) ստեղծումը վկայում է նրանց տնտեսական բարձր կապերի մասին: Մենք նպատակադրվել ենք, որպեսզի կողմերն ավելացնեն իրենց ներդրումների ծավալը` հասցնելով այն 7-ական միլիարդ դոլարի:
Բացի այդ, մենք մտադիր ենք ավելացնելու երկու երկրների միջև ապրանքաշրջանառությունը, ինչպես նաև երրորդ երկրներում մեր համագործակցությունը: 2008 թվականին երկու երկրների միջև ապրանքաշրջանառության ծավալը հասավ իր գագաթնակետին` 37.8 միլիարդ դոլարի, ինչը, սակայն, որոշակի անկում ապրեց գլոբալ ֆինանսական ճգնաժամի պատճառով:
Մեր արտահանումն ավելացնելու համար գիշեր-ցերեկ աշխատում ենք: Վերջին 22 ամսում իրականացվել է 89 արտաքին այց:
Թուրքիան նաև շինարարական մեծածավալ աշխատանքներ է իրականացնում ողջ աշխարհում, որի 18 տոկոսը բաժին է ընկնում Ռուսաստանին: Վերջին 20 տարիներին Թուրքիան Ռուսաստանում իրականացրել է 33.7 միլիարդ դոլարի շինարարական աշխատանք, որի 75 տոկոսը` վերջին 8 տարիների ընթացքում (այսինքն՝ Էրդողանի գլխավորած «Արդարություն ու զարգացում» կուսակցության իշխանության տարիներին):
Ռուսաստանն ընդարձակ երկիր է, այնտեղ բնակվում է 140 միլիոն մարդ և կա 1 միլիոնից ավելի բնակչություն ունեցող 13 քաղաք, ինչը չպետք է վրիպի թուրք գործարարների աչքից»:
Հիշեցնենք, որ Թուրքիան նպատակադրվել է մինչև 2023 թվականը (երկրի հիմնադրման 100-ամյակը) տեղ զբաղեցնել տնտեսական պլանում աշխարհի առաջատար երկրների լավագույն տասնյակում: Ներկա դրությամբ Թուրքիան G-20-ում զբաղեցնում է 16-րդ տեղը: