ԱՄՆ հանրապետական կուսակցությունից նախագահի թեկնածու Միթ Ռոմնիի նախընտրական շտաբը զգուշացրել է ամերիկաացի քրիստոնյաներին, որ երկրի նախագահ Բարաք Օբաման «իրական սպառնալիք» է հանդիսանում իրենց ազատ դավանանքի համար: Ինչպես հաղորդում է The Huffington Post առցանց պարբերականը` նման հայտարարությունը պարունակվում է հանրապետական թեկնածուի գովազդում, որը տարածվում է ավտոմատ հեռախոսազանգերի միջոցով:
Գովազդի հեղինակները ընտրողներին հիշեցրել են Օբամայի 2008թ. խոսքերը, երբ նա ասել է, որ տնտեսական ճգնաժամի պայմաններում ամերիկացիները դիմում են կամ զենքին, կամ էլ կրոնին: Բացի այդ, հաղորդագրության մեջ նշվում է, որ նախագահի պաշտոնում Օբաման քրիստոնեական կազմակերպություններին ստիպել է ապահովագրություն ներկայացնել, որոնք հակասում են նրանց կրոնական համոզմունքներին: Խոսքը հավանաբար այդ կազմակերպությունների կողմից իրենց աշխատակիցների հակաբեղմնավորիչների ծախսերը հոգալու որոշման մասին է:
«Միթ Ռոմնին հասկանում է ընտանիքի և հավատքի կարևորությունը: Այդ պատճառով այդքան շատ քրիստոնյա առաջնորդներ աջակցում են Ռոմնիին: Նրանք գիտեն, որ չի կարելի անտեսել այն սպառնալիքը, որը Բարաք Օբաման ներկայացնում է մեր հավատքի, արժեքների, ազատության համար»,- նշվում է գովազդում:
Ռոմնին նախընտրական քարոզարշավի ժամանակ անձամբ նման կտրուկ հայտարարություններ չի կատարել, միայն նշել է, որ Օբամայի առողջապահության քաղաքականությունը հավասար է դավանանքի դեմ պատերազմի:
