«Սա առաջին և վերջին անգամն է, որ ես կմասնակցեմ նախագահական ընտրություններին: Ես հավատացած եմ, որ հայ ժողովուրդը պատրաստ է մեծ փոփոխության: Հարգանք ունենալով նախագահական ընտրությունների նկատմամբ և ընդդիմադիր լինելով երեք նախագահներին՝ հավատացած եմ, որ մեր ժողովուրդը ուզում է փոփոխություն, ուզում է իշխանություն, որը չի հարստանա, քանի դեռ երկրում մեկ աղքատ կա, իշխանություն, որը կբերի խորհրդարանական երկիր, շարքային հայ մարդու արժանապատվություն հարգանք և փող՝ նորմալ ապրելու համար: Հայ ժողովուրդը վերջապես 20 տարվա ընթացքում իր խոսքն ու գործը մեկ պետք է անի»,- Հանրային հեռուստաընկերության «Հարցազրույց» հաղորդմանը, խոսելով իր՝ նախագահի թեկնածու առաջադրվելու մասին, ասել է «Ժառանգություն» կուսակցության նախագահ Րաֆֆի Հովհաննիսյանը:
Նա նշել է, որ բոլոր նախագահական ընտրությունները ոչ միայն միջազգային, այլև հայկական ընտրությունների չափանիշներով անգամ չեն անցել, վարչական ռեսուրսներ են օգտագործվել, մեծ փողեր բաժանվել, ուսուցիչներին, բժիշկներին, մեր հպարտությանը՝ զինվորներին օգտագործել ձայներ տանելու համար: «Եթե 20 տարվա ընթացքում լինեն արդար ընտրություններ, մենք կունենանք նոր նախագահ, եթե նույն չափանիշները կիրառվելու են, ես իմ քաղաքացիական գործընկերների հետ միասին պայքարելու եմ մինչև այն ժամանակ, որ մենք ունենանք ժողովրդին վայել հաղթանակ, եթե ժողովուրդն ուզենա: Սա հավաքական թեկնածության հարց է, ես պատրաստ եմ, որպես ՀՀ քաղաքացի, այս պայքարը տանել դեպի հաղթանակ, եթե երիտասարդները, մտավորականները, այն քաղաքական ուժերը, որ ուզում են ազատ, ինքնիշխան հայրենիք, այս պայքարը տանեն առաջ»,- ասել է Րաֆֆի Հովհաննիսյանը՝ հավելելով. «Պետք է իշխանությունը պատկանի ժողովրդին, ոչ թե մեկ մարդու կամ կուսակցության»:
Դեկտեմբերի կեսերին տեղի կունենա «Ժառանգության» համագումարը, որը կորոշի նախագահական ընտրություններին իրենց մասնակցության այլ մանրամասներ ևս: Իսկ եթե մեկ այլ ընդդիմադիր թեկնածու որոշի մասնակցել ընտրություններին՝ որպես միասնական թեկնածու, Րաֆֆի Հովհաննիսյանը կհասնի համապատասխան համաձայնության։ «Ես միշտ կողմնակից եմ եղել մեկ ուրիշի կողքը կանգնելու գաղափարին: Իմ հայտը լինելու է միայն 2013 թվականի համար»,– ասել է նա:
