Բրիտանական նավթագազային British Petroleum (BP) ընկերությունը մինչև 12 մլրդ դոլար կներդնի Ինդոնեզիայում գազի արդյունահանման մեջ, միևնույն ժամանակ թագավորության կառավարությունը ակտիվացնում է սպառազինության արտադրության ոլորտում համագործակցությունը Ջակարտայի հետ: Այս մասին հայտնում է RIA Novosti-ն:
Համապատասխան համաձայնագիրը ստորագրվել է երեկ՝ Ինդոնեզիայի նախագահ Սուսիլո Բամբանգի Յուդհոյոնոյի՝ Լոնդոն կատարած պետական այցի ընթացքում:
«Երեք հազար կղզիների երկրի» արևելյան հատվածում նավթի և գազի հանքավայրերն արդեն իսկ ակտիվորեն շահագործող BP-ն մտադիր է Արևմտյան Պապուա նահանգում ընդլայնել հեղուկացված գազի արտադրության համալիրը՝ հայտարարել է Ինդոնեզիայի Էներգետիկայի և Լեռնաարդյունաբերության նախարարության պաշտոնական ներկայացուցիչ Սուսյանտոն: Իր հերթին, մեկ այլ բրիտանական ընկերություն՝ Premier Oil-ը, նույնպես հայտարարել է ինդոնեզական նավթագազային ոլորտում 700 մլն դոլարի ներդրման մտադրության մասին՝ հավելել է նա:
Ինդոնեզիայի նախագահին ուղեկցող երկրի ՊՆ նախարար Պուրնոմո Յուսգիանտորոն իր բրիտանացի գործընկեր Ֆիլիպ Հեմոնդի հետ ստորագրել է պաշտպանության ոլորտում համագործակցության փոխըմբռնման մասին հուշագիր: Ինդոնեզական ԶԼՄ-ների տեղեկություններով՝ այդ փաստաթուղթը նախատեսում է համագործակցություն ռազմական արտադրանքների «գիտական հետազոտությունների և մշակումների, ներդրումների և արտադրության» ոլորտում:
Դեռևս 2007 թվականին Մեծ Բրիտանիայի կառավարությունը Ինդոնեզիան անվանել էր իր գլխավոր առաջնահերթությունը՝ Հարավարևելյան Ասիայի պետությունների ասոցացիայի հետ պաշտպանական համագործակցության շրջանակում: Այս մասին հայտնում է Antara ինդոնեզական գործակալությունը:
