Եգիպտոսի պաշտպանության նախկին նախարար Աբդել Ֆաթահ Ալ-Սիսին, որն իր թեկնածությունն է առաջադրել երկրի նախագահական ընտրություններում, խոստացել է, որ իր ընտրվելու դեպքում բանակը ոչ մի դերակատարություն չի ունենա պետության կառավարման գործում՝ ասել է նա CBC և ONtv մասնավոր հեռուստաալիքներին տված հարցազրույցում:
Նա նշել է, որ ինքը զինված ուժերի թեկնածու կամ դրածո չէ: Ալ-Սիսիի խոսքով՝ զինվորականներն «իրեն չեն աջակցել և չեն աջակցի»:
«Եգիպտոսի բանակը հակված է կատարելու իր դերը, որը կայանում է միայն հայրենիքի պաշտպանության մեջ և ոչ թե քաղաքականությանը խառնվելու»,- հայտարարել է նախագահի թեկնածուն: Նա նշել է, որ սկզբնական փուլում իր կառավարման առաջնահերթությունը կլինի կայունությունը և անվտանգությունը, դրան զուգահեռ ինքը կաշխատի տնտեսության վերելքի և զարգացման ուղղությամբ:
Աս-Սիսին հայտնել է, որ իր նկատմամբ մահափորձ է պատրաստվել: «Ուժային կառույցները հունիսի 30-ից (նկատի է առնվում անցած տարվա «հունիսի 30-ի հեղափոխությունը») հետո բացահայտել են իմ նկատմամբ 2 մահափորձ»,- ասել է նա: Աս-Սիսին այլ մանրամասներ չի հայտնել:
Ֆելդմարշալն ասել է, որ ընտրություններին գնալ իրեն դրդել է հուլիսի 3-ին նախկին նախագահ Մուհամմեդ Մուրսիի պաշտոնանկությունից հետո Եգիպտոսում տարածված ահաբեկչության ալիքը: «Ես ոչ ոքից թույլտվություն չեմ հարցրել՝ ինչ անեմ հունիսի 30-ից հետո, ապագայում էլ չեմ հարցնի,- ասել է նա՝ նշելով, որ հարցրել է ընտանիքի կարծիքը:- Կինս ու ընտանիքիս անդամները վախեցան, բայց նրանք ինձ վստահեցրին, որ առաջադրվելուց զատ՝ այլ ընտրություն չունեմ»:
Եգիպտոսում նախագահական ընտրությունները կանցկացվեն մայիսի 26-27-ին: Եթե առաջին փուլում նախագահ չընտրվի, երկրորդ փուլը կանցկացվի հունիսի 16-17-ին:
