ԱԺ նախագահի պաշտոնին ինքնաառաջադրված թեկնածու, ՀԱԿ խմբակցության պատգամավոր Հրանտ Բագրատյանն այսօր ԱԺ-ում իր ելույթը սկսեց կենսագրական տվյալների ներկայացմամբ: Բագրատյանը ծնվել է 1955թ., գիտության դոկտոր է, դոկտորի աստիճան ստացել է Մոսկվայում, տիրապետում է 5 լեզուների՝ մաքուր, գերազանց կարդալով, արտահայտվելով։
Թեկնածուն հիշեցրեց, որ եղել է վարչապետ, և ինչքան էլ իր մասին չարախոսեն՝ ՀՆԱ-ի տնտեսական աճ է ստացել 1994-ին` ԱՊՀ երկրների մեջ առաջինը, նրա խոսքով՝ 1996թ.-ին ՀՆԱ-ի չափանիշով Հայաստանը գերազանցում էր և Վրաստանին, և Ադրբեջանին։
Բագրատյանի խոսքով՝ վարչապետության տարիներին իրականացրել է անհավանական ծրագրեր, որոնցով ոչ միայն կարողացել է ստանալ էլեկտրաէներգիա, այլև այն արտահանել, ձեռնամուխ է եղել ատոմակայանի վերագործարկման գործին: Բագրատյանը նաև տեղեկացրեց, որ 1994թ.-ին իր իրականացրած էներգետիկ ռեֆորմը նույնիսկ տեղ է գտել միջազգային վալյուտային ֆոնդի ուղեցույցում։
Թեկնածուն խոսեց նաև իր կողմից առաջ քաշված հողային, հակաօդային պաշտպանության ռեֆորմի մասին և նույնիսկ, ինչքան էլ քննադատում են դա, նաև սեփականաշնորհման ռեֆորմից։
«Այո, ես սեփականաշնորհման հայրն եմ եղել, ես ընդունում եմ, բայց դրանով հանդերձ՝ մի կրպակ անգամ ինձ չեմ վերցրել։ Չեմ ասում՝ մեր տարիներին եսիմինչ էր, բայց համեմատած՝ ֆանտաստիկ հաջողություն էր»,- ասաց նա։
Անդրադառնալով ԱԺ բարեփոխումների ծրագրին՝ Բագրատյանը նշեց, որ այն վեց կետից բաղկացած խորը բարեփոխումների ծրագիր է։ Նախ՝ նրա առաջարկով՝ ԱԺ-ի գործունեութան մեջ պետք է տարբերել օրենսդիր և վերահսկիչ ֆունկցիաները, նաև՝ վերահսկողությունն ամբողջովին կտրվի ընդդիմությանը։
Բագրատյանը խոստացավ վերափոխել ամբողջ բյուջետային գործընթացը, որ սահմանվում է Սահմանադրության կոպիտ խախտումներով, իսկ եկամուտների չհաստատելը բերում է նրան, որ այդ ընթացքում կառավարությունը եկամուտները հավաքում է այնպես, ինչպես ուզում է։ Թեկնածուն կարևորեց նաև ԱԺ դերի բարձրացման անհրաժեշտությունը, միջազգային կապերի ամրապնդումը, հատկապես՝ հարևան երկրների հետ։
Թեկնածուի ելույթից հետո պատգամավորները նրան ուղղելիք հարցեր չունեցան: Նիստը վարող Էդուարդ Շարմազանովը նշեց, որ հարցեր չկան, ապա հավելեց՝ «պարոն Բագրատյան, տիկին Զոհրաբյանը հիացած է ձեր ելույթով»։
