Հայաստանի Հանրապետության գրեթե բոլոր պաշտոնյաների հանդեպ «Բարգավաճ Հայաստան»-ը «Հռոմի պապից» ավելի ընդդիմադիր է, իսկ ահա Սերժ Սարգսյանի հանդեպ «Բարգավաճ Հայաստան»-ը զուսպ է բոլորից: Սերժ Սարգսյանի հանդեպ ԲՀԿ-ի հավակնությունների վերաբերյալ լրագրողական հարցերը «Բարգավաճ Հայաստան»-ում բնորոշում են որպես ոչ կոռեկտ: Սարգսյանի հասցեին, Սարգսյանի պատասխանատվության մասին` ոչ մի խոսք: Անգամ ԲՀԿ-ի ներսում ամենաընդդիմադիր Վարդան Օսկանյանը երբեք չի բարձրացնում Սերժ Սարգսյանի ուղղակի պատասխանատվության և նրա հեռանալու անհրաժեշտության մասին հարցը:
Խոսքը ամենևին «Սերժիկ, հեռացիր» ՀԱԿ-ական կարգախոսը բղավելու մասին չէ: «Բարգավաճ Հայաստան»-ը նույնիսկ քաղաքակիրթ մրցակցություն և մշակույթ կոչվածի սահմաններում չի համարձակվում տեղավորել Սերժ Սարգսյանի պաշտոնանկության մասին հարցը:
Ինչո՞ւ է ԲՀԿ-ն այդպես վախենում կամ զգուշանում Սերժ Սարգսյանի անունով պահանջ ներկայացնելուց: ԲՀԿ-ն գիտի իր հավակնությունների և կարողությունների սահմանն ու հասկանո՞ւմ է, որ չի ձգի Սերժ Սարգսյանին, թե՞ պարզապես այդ ամենը պայմանավորված է այն դիապազոնով, որ տրված է ԲՀԿ-ին իշխանական ամբողջական խաղում, և այդ իսկ պատճառով «Բարգավաճ Հայաստան»-ը շարժվում է հստակ սցենարով` բոլորին ամեն ինչ, Սերժ Սարգսյանին` ոչինչ:
Գագիկ Ծառուկյանը մեկումեջ, բայց աշխատում է հետևողականորեն ճանապարհել և դիմավորել Սերժ Սարգսյանին օտարերկրյա այցերի ընթացքում` այն դեպքում, երբ չի մասնակցում ԱԺ նիստերին, որտեղ կարող է գալ և իր այդքան սիրած ժողովրդի շահերը պաշտպանել մեկ ավելի ձայնով:
Առավել հավանական է, որ գործ ունենք ոչ թե նախապես գծված հստակ սցենարի, այլ ավելի շուտ` ԲՀԿ-ի առնվազն ենթագիտակցական պրագմատիզմի հետ: Այսինքն` «Բարգավաճ Հայաստան»-ը գուցե բնազդով հասկանում է, որ ինքն ունակ չէ, կարող չէ, ռեսուրս չունի դուրս գալու առաջին դեմքի մակարդակով պայքարի և ներկայացնելու նախագահական հավակնություններ: Կամ, ավելի շուտ, ներկայացնել կարող է, պարզապես չի կարող լրջորեն հետապնդել դրանք:
Սակայն ինչ է անելու ԲՀԿ-ն սեփական թեկնածու առաջադրելու դեպքում: Մի՞թե այդ ժամանակ էլ «Բարգավաճ Հայաստան»-ը խուսափելու է Սերժ Սարգսյանին հեռացնելու մասին խոսելուց: Իսկ այդ դեպքում ո՞ւմ դեմ է լինելու «Բարգավաճ Հայաստան»-ի թեկնածուի պայքարը, թեկուզ քաղաքակիրթ պայքարի շրջանակում:
Ամենայն հավանականությամբ` «Բարգավաճ Հայաստան»-ը համաշխարհային ընտրական պատմության անգերազանցելի ռեկորդ կսահմանի, երբ նախագահական ընտրությունների թեկնածուն մի ամբողջ արշավ է իրականացնում` առանց մրցակցի հեռանալու մասին որևէ խոսքի: ԲՀԿ-ի ներկայիս կեցվածքը երևի թե խոսում է այն մասին, որ այս կուսակցությունը, չնայած իր առաջնորդի հայտարարություններին, թե` պատրաստ է կորցնել իր հարստությունը, իրականում բացարձակապես պատրաստ չէ դրան և իշխանության իր բաժնի համար կպայքարի այնքան կամ մինչև այնտեղ, որտեղից արդեն սկսեն ռեալ վտանգներ արդեն ունեցած բաժինների մասով: Այդ ժամանակ արդեն ԲՀԿ-ն ցույց կտա, որ ոչ մի ունեցվածքի կորստի էլ պատրաստ չէ, և եթե նույնիսկ պատրաստ է, ապա ընդամենը մասից հրաժարվելով` եղած ողջը չկորցնելու համար:
Լուսանկարը` PanARMENIAN Photo-ի
