Սիրիայում տեղի ունեցած ահաբեկչության զոհերի թիվը հասել է 47-ի: Այս մասին հաղորդում է France-Presse գործակալությունը՝ հղում անելով «Մարդու իրավունքների պաշտպանության մշտադիտարկման սիրիական կենտրոնին»:
Դամասկոսում ուրբաթ օրն ականապատ ավտոմեքենա է պայթել: Ավելի վաղ հաղորդվում էր, որ այդ ահաբեկչության արդյունքում զոհվել է հինգ մարդ, ավելի քան 30-ը վիրավորվել է: Համանման ահաբեկչություն տեղի է ունեցել նաև Դերայի ծայրամասում, որտեղ պայթյունը տեղի է ունեցել զինվորական անցակետի մոտ:
Հիշեցնենք, այսօր Սիրիայում սկսել են նշել Իդ Ալ-Ադհա մահմեդական տոնը: Սիրիական զինված ուժերի հրամանատարությունը հայտարարել է տոնի ընթացքում՝ հոկտեմբերի 26-29-ը, երկրի ողջ տարածքում ռազմական գործողությունները դադարեցնելու մասին: Սակայն առանձին ահաբեկչական խմբավորումները, որոնք գործում են Սիրիայի տարածքում, հայտարարել են, որ մտադիր չեն հրադադար պահպանել:
Սիրիական բանակի ղեկավարությունն իր հերթին հաղորդել է, որ հրադադար է պահպանում, սակայն ստիպված է պատասխանել գրոհայինների անընդհատ հարձակումներին:
