«Նուբարաշեն» ՔԿՀ-ի կալանավորները շարունակում են հացադուլը: Այս մասին «Առաջին լրատվական»-ի հետ զրույցում տեղեկացրեց ԱՆ Քրեակատարողական վարչության մամլո խոսնակ Գոռ Ղլեչյանը. «Դատապարտյալներն իրենց խցերում են՝ բժիշկների հսկողության տակ, հացադուլը շարունակում են»,- նշեց նա:
Հիշեցնենք, որ «Նուբարաշեն» ՔԿՀ-ի դատապարտյալ Կարեն Թառոյանը մեղադրվում է ՀՀ քրեական օրենսգրքի 112հ. 2-րդ մասի 14 կետով (դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահ) և դատապարտվել է 9 տարվա ազատազրկման: Սերոբ Մխիթարյանը մեղադրվում է ԼՂՀ քրեական օրենսգրքի 177հ. 3-րդ (գողություն) և 165հ. 4-րդ մասով (անչափահասին հանցանքի կատարմանը ներգրավելը) և դատապարտվել է 6 տարվա ազատազրկման: Քննիչի համապատասխան որոշմամբ նա 31.07.2012թ. ԼՂՀ-ից տեղափոխվել է ՀՀ, քանի որ Ս. Մխիթարյանի նկատմամբ հարուցվել է ևս մեկ քրեական գործ: Մեղադրյալ Վարդան Դեմիրճյանը մեղադրվում է ՀՀ քրեական օրենսգրքի 34-104հ. 2-րդ մասի 1 և 6 կետերով (սպանության փորձ), 185հ. 3-րդ (գույքը դիտավորությամբ ոչնչացնելը կամ վնասելը, որն առանձնապես խոշոր չափերի վնաս է պատճառել) և 325հ. 1-ին մասի (պաշտոնական փաստաթուղթ կեղծելը) հատկանիշներով: Իսկ Արթուր Խաչատրյանը մեղադրվում է ՀՀ քրեական օրենսգրքի 132հ. 1-ին (մարդու թրաֆիքինգը) և 182հ. 1-ին մասի (շորթում) հատկանիշներով` հոկտեմբերի 22-ին: Նրանք բոլորը հացադուլ են հայտարարել և բողոքում են իրենց գործի ընթացքից: Իսկ դատապարտյալ Թառոյանը՝ ի նշան բողոքի, կտրել է աջ ձեռքի ճկույթը:
