Մարդու վարքագիծն ու արժեհամակարգը կախված է նրանից, թե նա որ ձեռքն է առավելապես օգտագործում: Աջլիկների համար ամեն լավը, բարին ու հաճելին աջ կողմում է, ձախլիկների համար բարու և արդարության աղբյուրը հակառակ կողմում է:
Այսպիսի եզրակացության են եկել Գերմանիայի Մաքս Պլանկի անվան Հոգելեզվաբանության գիտահետազոտական ինստիտուտի հետազոտողները:
Current Directions in Psychological Science-ում Դանիել Կասասանտոն գրում է, որ եթե մի կողմ թողնենք հոգեբանության, գեղարվեստական և ռացիոնալ կողմի մասին դատողությունները, կտեսնենք, թե ինչպես են աջ ու ձախ ձեռքերն ազդում ցանկացած որոշման վրա: Փորձերի ժամանակ գիտնականները մասնակիցներին առաջարկել են ընտրել որևէ իր, թափուր աշխատատեղերի առաջարկներին պատասխանել, ընտրել, թե նկարված անծանոթ էակներից որն է ավելի վստահելի թվում: Բոլոր դեպքերում ընտրությունը համընկել է նրա հետ, թե մասնակցի որ ձեռքն է գլխավորը եղել: Ձախլիկներն ընտրել են այն ամենը, ինչ ձախ կողմում է եղել, աջլիկները` ընդհակառակը:
«Լավ» կամ «վատ» գնահատականները ևս կախված են եղել աջլիկ կամ ձախլիկ լինելուց: Այսինքն` աջլիկների համար այն ամենը, ինչը եղել է աջ կողմում, եղել է լավը, բարի, հաճելի, իսկ ձախ կողմինը` չար, վատը: Գիտնականները սա բացատրել են այսպես. աջլիկներն աշխարհը հետազոտում են աջ կողմից, նրանց համար ձախ կողմից շփումն ու կապը շրջապատող աշխարհի հետ դժվար է, այդ պատճառով ձախ կողմից ամեն ինչ թվում է բարդ ու վտանգավոր:
