Համաշխարհային բանկի և Միջազգային ֆինանսական կորպորացիայի կողմից 2012 թվականի հոկտեմբերի 23-ին հրապարակված «Ճկուն կարգավորումներ ՓՄՁ-ների համար 2013» վարկանիշային զեկույցի տվյալներով` նախորդ տարվա համեմատ Հայաստանը բարելավել է իր դիրքը 18 կետով` 185 երկրների շարքում գրավելով 32-րդ դիրքը: Զեկույցը կազմվում է գործարարների և պետական մարմինների կողմից լրացրած հարցաթերթիկների ամփոփման հիման վրա: Ինչպես ՀՀ կառավարության մամուլի կենտրոնում այսօր կայացած ասուլիսում տեղեկացրել է ՀՀ էկոնոմիկայի նախարար Տիգրան Դավթյանը, Հայաստանի այս տարվա արդյունքներն աննախադեպ են. վերջին երկու տարիների զեկույցների տվյալներով` Հայաստանն իր դիրքը բարելավել է 29 կետով:
«Սա խոսում է այն մասին, որ այս զարգացումներն ու առաջընթացը կրում են շարունակական բնույթ: Դա արդեն որակական փոփոխություն է, և կարծում եմ, որ մենք դեռ անելիքներ ունենք»,-նշել է էկոնոմիկայի նախարարը:
«Գործարարությամբ զբաղվելը 2013» զեկույցում Հայաստանն ամենամեծ առաջընթացն արձանագրել հետևյալ ցուցիչներով. «Ներդրողների պաշտպանվածություն»- դիրքը բարելավվել է 73 կետով` 98-րդ տեղից բարձրանալով 25-րդ տեղը, «Հարկերի վճարում»- դիրքը բարելավվել է 44 կետով` 152-ից բարձրանալով 108-րդ տեղը, «Էլեկտրականության միացում»- դիրքը բարելավվել է 42 կետով` 143-ից բարձրանալով 101-րդ տեղը: Երեք կետով առաջընթաց է արձանագրվել նաև «Շինարարության թույլտվությունների ստացում» ցուցիչով:
Տ.Դավթյանը տեղեկացրել է նաև, որ այս զեկույցի տվյալներով Հայաստանի գործարար միջավայրը լավագույնն է ԱՊՀ երկրների շարքում և երկրորդն է տարածաշրջանում` զիջելով միայն Վրաստանին:
ՊԵԿ նախագահի տեղակալ Արմեն Ալավերդյանն, անդրադառնալով կառավարության այսօրվա նիստում ընդունված «Հարկ վճարողների հաշվետվությունները ներկայացնող ֆիզիկական անձանց նույնականացման քարտերի հաշվառման մասին» որոշմանը, նշել է, որ այն ուղղված է 2013թ. հունվարի 1-ից եկամտային հարկի ներդրամը: «Ինչպես գիտենք, եկամտային հարկի հաշվետվությունները հարկային մարիններին պետք է ներկայացվեն բացառապես էլեկտրոնային եղանակով: Սուբյեկտները, քաղաքացիները, ովքեր լիազորված են իրենց կազմակերպությունների կողմից էլետրոնային հաշվետվություններն ուղարկելու, պետք է ոստիկանության անձնագրային և վիզաների վարչության տարածքային ստորաբաժանումներից ստանան նույնականացման քարտերը, դիմում ներկայացնեն հարկային մարմինների գաղտնաբառը ստանալու համար, հաշվառվեն հարկային մարմնում»,-ասել է նա:
Ա.Ալավերդյանը տեղեկացրել է նաև, որ մինչև նոյեմբերի 30-ը դիմողները կստանան անվճար էլեկտրոնային ստորագրություն, իսկ նույնականացման քարտի համար նախատեսվող պետական տուրքը` 3000 դրամը, կփոխհատուցի կառավարությունը:
Լուսանկարը՝ PanARMENIAN Photo-ի
