Այս տարվա առաջին 9 ամիսներին պետական գույքի մասնավորեցումից մուտքերը կազմել են 219 մլն դրամ, որից պետական բյուջե է մուտքագրվել մոտ 171 մլն դրամ, համայնքներին փոխանցվել է 49 մլն դրամ: Այս մասին այսօր լրագրողներին տեղեկացրեց ՀՀ ԿԱ պետական գույքի կառավարման վարչության պետ Արման Սահակյանը:
Պետական գույքի օտարումից ստացվել է 687 մլն դրամ, որից պետբյուջե է մուտք եղել 493 մլն դրամ, համայնքներին` 194 մլն դրամ: 2012թ.-ի հոկտեմբերի 1-ի դրությամբ պետական գույքի վարձակալությունից պետական բյուջե է մուտքագրվել շուրջ 170 մլն 270 հազար դրամ: Այս տարի մասնավորեցման համար նախատեսված է 7 ընկերություն, 3-ն արդեն վաճառվել են:
Միաժամանակ, ըստ Ա. Սահակյանի, մասնավորեցման գործընթացից հանվել են բազմաթիվ գիտահետազոտական ինստիտուտներ և այլ կառույցներ, օրինակ՝ Ստեփանավանի օդանավակայանը, որը նա բնորոշեց որպես «ռազմավարական կառույց»:
«Իհարկե անթերի չենք աշխատում, ամեն ինչ չի գոհացնում մեզ, բայց այն պարտականությունը, որ դրված է մեզ վրա` 7% աճին հասնելու ենք»,- ասաց Սահակյանը:
Լուսանկարը՝ PanARMENIAN Photo-ի
