Հոկտեմբերի 15-ին ՀՀ ԱՆ-ից ՀՀ ԳՆ ՍԱՊԾ անասնաբուժական տեսչություն ահազանգ է ստացվել՝ հանրապետության հիվանդանոցներից մեկում կա սիբիրախտ հիվանդության ախտանիշներով մարդ: Ձեռնարկվել են քայլեր այդ մարդու բնակության վայրը պարզելու և տեղում աշխատանքներ իրականացնելու համար: Այս մասին այսօր ՀՀ ԳՆ ՍԱՊԾ խորհրդակցություններրի դահլիճում լրագրողների հետ հանդիպման ժամանակ ասաց անասնաբուժության տեսչության պետ Հովհաննես Մկրտչյանը՝ խոսելով «Սիբիրախտ հիվանդության նկատմամբ կատարված անասնահամաճարակային միջոցառումները և վերահսկողական աշխատանքները» թեմայի շուրջ:
Բանախոսը տեղեկացրեց, որ ահազանգը ստացվելուն պես ՀՀ ԳՆ ՍԱՊԾ անասնաբուժության տեսչության աշխատակիցները Վարդենիսի տարածաշրջանի Ծովակ գյուղ են ուղևորվել, որտեղ բազում աշխատանքներ են իրականացվել. գյուղի բնակիչների սառնարաններից մսի մնացորդները հավաքագրվել են, ոչնչացման աշխատանքներ են իրականացվել:
«Հանգամանքները ցույց են տվել, որ բակային մորթ է իրականացվել, որի հետևանքով է այդ մարդը վարակվել հիվանդ կենդանու մսից: Գյուղում մսեղիքի հայտնաբերման աշխատանքներին խոչընդոտել են գյուղացիները, սակայն տներից հավաքելուց հետո, այնուամենայնիվ, մսեղիքը ոչնչացվել է այրման եղանակով, իսկ այրման տեղն ախտահանվել է»,- մանրամասնեց Հովհաննես Մկրտչյանը՝ շարունակելով, որ ամսի 15-ից մինչև օրս ծառայության բոլոր աշխատակիցները ոտքի վրա են եղել, որ պարզեն՝ կա՞ չոչնչացված մսեղիքի կտոր, թե՞ ոչ:
Բանախոսը տեղեկացրեց, որ Ծովակ համայնքում և հարակից համայնքներում կենդանիների ռեվակցինացիա է իրականացվել, ուստի այս պահին չկա որևէ հիվանդ կենդանի: Ըստ նրա՝ պատվաստման աշխատանքներից հետո մայրուղիների վրա պահակակետեր են տեղադրվել կենդանու մսեղիքի տեղափոխումն այլ համայնք բացառելու նպատակով: Հովհաննես Մկրտչյանի վստահեցմամբ՝ աշխատանքները մինիմում տասնհինգ օր կշարունակվեն, քանի որ վակցինացված կենդանին մոտավորապես այդքան մորթի չպետք է ենթարկվի:
«Հնարավոր է, որ մեկ կենդանին, որը վարակի աղբյուր է հանդիսացել, պատվաստման չի ենթարկվել, կամ այլ պատճառ է եղել: Մեղավորները խստագույնս պետք է պատժվեն, եթե կենդանին պատվաստումից դուրս է մնացել: Եթե պարզվի, որ մեղավորություն կա, մեղավորները կպատժվեն: Հաջողվել է պարզել օջախը, ախտահանության գործընթացն էլ շարունակվում է»,- նշեց Հովհաննես Մկրտչյանը: Նա քաղաքացիներին վստահեցրեց, որ հանրապետությունում առանց ուղեկցող փաստաթղթի միս չի վաճառվում:
Լուսանկարը՝ PanARMENIAN Photo-ի
