Այսօր ԱԺ նիստում Հանրային հեռուստառադիոընկերության 2010 թ. հաշվետվության քննարկման ժամանակ ՀԱԿ պատգամավոր Նիկոլ Փաշինյանը պարզաբանում պահանջեց ընկերության խորհրդի նախագահ Ալեքսան Հարությունյանից, թե ինչպես է ստացվել, որ, ըստ հաշվետվության, 2010-ին Հանրային հեռուստատեսությունն ունեցել է 71 հազ. դրամ գովազդային եկամուտ 24 ժամվա ընթացքում, մինչդեռ, ըստ լուրերի, այդքան արժե գովազդի 1 րոպեն, սակայն ըստ հաշվետվության՝ 1 րոպեն 1600 դրամ է ստացվում:
Ն. Փաշինյանը նկատեց, որ վիճակը շատ ավելի զավեշտային է հանրային ռադիոյում, որտեղ գովազդային եկամուտը ստացվել է 11 մլն 860 դրամ, 1 ժամում՝ 1354 դրամի եկամուտ: Այսինքն ստացվում է, որ 1 րոպեն 96 դրամ է:
Ա. Հարությունյանը նշեց, որ Հանրային հեռուստատեսությունն ու ռադիոն գովազդով չեն զբաղվում, այլ առանձին ընկերություն է շահել մրցույթը: Ա. Հարությունյանի խոսքերով՝ հանրային հեռուստաընկերությունում գովազդի 1 րոպեն արժե120-130 հազ. դրամ (ներառյալ ԱԱՀ-ն):
Զուգահեռ զեկուցող ՀՀԿ-ական պատգամավոր Կարինե Աճեմյանը նշեց, որ գովազդի վերաբերյալ ավելի մանրամասն հաշվետվություն Ա. Հարությունյանը կներկայացնի 2011-ի հաշվետվության ներկայացման ժամանակ:
Անդրադառնալով եթերը ողողած անորակ հեռուստասերիալների վերաբերյալ պատգամավորների բողոքին՝ Կ. Աճեմյանը տեսակետ հայտնեց, թե «հեռուստասերիալները նույնպես ունեն ապրելու իրավունք, սերիալները ոմանց դուր են գալիս, ոմանց՝ ոչ, իսկ եթե դուր չի գալիս, կարող են չնայել»:
«Ժառանգության» պատգամավոր Զարուհի Փոստանջյանը համոզվածություն հայտնեց, որ Հանրային հեռուստատեսության դերակատարումը սերիալների հեռարձակումը չէ, այլ մեր երեխաներին ՀՀ քաղաքացի դաստիարակելը: Նա հարցրեց Կ. Աճեմյանին՝ «Ձեր կարծիքով, մեր հասարկությունը սերիալներ դիտո՞ղ հասարակություն է»:
«Այո, մեր հասարակությունը սերիալներ դիտող հասարակություն է, այլապես այդքան ռեյտինգ չէին ունենա: Ես չեմ նայում սերիալ, և իմ երեխան չի նայում: Սերիալը ժամանցի տեսակ է, ոչ թե դաստիարակության միջոց: 2012-ին ավելի քիչ են սերիալները, 1-2-ը, և չեմ կարծում, որ դրանք այդքան վտանգավոր են հասարակության համար»,- պատասխանեց Կ. Աճեմյանը:
Հիշեցնենք, որ Կարինե Աճեմյանը կինոդերասան Արա Դեղտրիկյանի կինն է:
