Միթ Ռոմնին Հանրապետական կուսակցության անդամների դրամահավաքի շնորհիվ ֆինանսական առավելություն է ստացել ԱՄՆ-ի նախագահ Բարաք Օբամայի նկատմամբ: Դա նրան հնարավորություն կտա ավելի շատ ծախսել նոյեմբերի 6-ին ԱՄՆ-ում կայանալիք նախագահական ընտրությունների նախընտրական վերջին փուլում:
Նախընտրական քարոզարշավների ֆինանսավորման մասին ներկայացված տեղեկությունները ցույց են տալիս, ֆոնդը, որը Ռոմնին և Հանրապետական ազգային հանձնաժողովը համատեղ օգտագործում են, կազմում է 183,1 միլիոն դոլար, այնինչ՝ Օբաման և Դեմոկրատական կուսակցությունն իրենց տրամադրության տակ ունեն 149,1 միլիոն դոլար: Այս տվյալները տրվել են սեպտեմբերի վերջին:
Ընտրական հանձնաժողովի զեկույցում ասվում է, որ Օբաման միայն սեպտեմբերին իր քարոզարշավի համար հավաքել է 136,2 միլիոն դոլար, իսկ Ռոմնին նույն ամսին՝ 76,1 միլիոն դոլար:
Սակայն Հանրապետական ազգայի հանձնաժողովի հետ Ռոմնին հնարավորություն ունի ավելի շատ ծախսել գովազդի և երկրով մեկ «ընտրողների ձայների համար» շրջագայելու վրա:
Նախընտրական քարոզարշավը հասել է վերջին փուլին, երկու թեկնածուներն էլ, ըստ հասարակական հարցումների, հավասար հնարավորություններ ունեն, հետևաբար, թե ով կստանա երկրի ղեկը, ցույց կտան միայն ընտրությունները:
