Մենք պետք է այնպիսի քայլեր նախաձեռնենք, որոնք թույլ կտան Աբխազիան և Ցխինվալի շրջանը կտրել Ռուսատանից։ Այս մասին այսօր մամլո ասուլիսի ժամանակ հայտարարել է Վրաստանի վերաինտեգրման հարցերով պետնախարարի թեկնածու Պաատա Զաքարեիշվիլին: Նրա խոսքերով՝ երբ դա արվի, անհրաժեշտ կլինի համաձայնեցնել նոր կառավարության հետ։ Այս մասին հայտնում է apsny.ge-ն:
«Կառավարությունն Աբխազիան և Օսիան գրեթե հանձնել է Ռուսաստանին, և դրանք ամբողջությամբ վերահսկում է հարևան պետությունը: Դա մեզ համար անընդունելի է: Հիմնական ուղղությունը կլինի այնպիսի քայլերի իրականացումը, որոնք այդ տարածքները կկտրեն Ռուսաստանից: Թե ինչպես դա կարվի, կառավարության հետ խորհրդակցությունների առարկա է: Որոշ քայլեր անհրաժեշտ է համաձայնեցնել»,- հայտարարել է Զաքարեիշվիլին:
Նա նաև անդրադարձել է Ռուսաստանի ԱԳՆ ղեկավար Սերգեյ Լավրովի հայտարարությանը, որի համաձայն՝ Աբխազիայի և, այսպես կոչված, Հարավային Օսիայի վերաբերյալ Ռուսաստանի որոշումը չի վերանայվի: «Լավրովի հայտարարությունը հետաքրքիր է, սակայն ինձ համար որոշիչ չէ: Ինձ համար կարևորն այն է, թե մենք ինչ կհայտարարենք: Հենց նոր կառավարությունը սկսի աշխատել, բոլորը կտեսնեն, որ մենք կոնկրետ քայլեր կձեռնարկենք, որոնք կնպաստեն, որպեսզի նման հայտարարություններն օդում կախված մնան»,- հայտարարել է պետնախարարի թեկնածուն:
