Մարտի 6-ին կայացած Գեղարքունիքի մարզի Դարանակի գյուղապետի ընտրություններում «վերընտրված» գյուղապետ, «Հանրապետական» կուսակցության անդամ Վլադիմիր Սարկիսյանը խնդրում է Սերժ Սարգսյանին, որ իր անմիջական հանձնարարականով գյուղում նոր ընտրություններ անցկացվեն:
«Արդեն լուրը հասել է նախագահին: Ես հույս ունեմ, որ իր անմիջական հանձնարարականով ընտրությունները անվավեր կճանաչվեն, և նոր ընտրություններ կանցկացվեն, որպեսզի մեր բնակիչները հանարավորություն ունենան առանց դրսի մարդկանց միջամտության վերջիվերջո նոր, նորմալ ընտրությունների մասնակցեն», – «Ժամանակ»-ի հետ զրույցում ասաց գյուղապետը:
Հարկ է նկատել, որ Գեղարքունիքի մարզի Դարանակ գյուղում համայնքի ղեկավարի և ավագանու ընտրություններին մասնակցելու գրանցում են ունեցել 122 ընտրող, այնինչ ընտրություններին նախորդող 10 օրերի ընթացքում ընտրողների թիվը հասել է 181-ի: Արդյունքում ընտրությունների օրը` ժամը 11.00-ի սահմաններում քվեաթերթիկներն արդեն սպառվել են, և գյուղի մոտ վաթսուն բնակիչներ չեն կարողացել մասնակցել ընտրություններին: Իսկ 3 ձայների առավելությամբ գյուղապետ է ընտրվել ՀՀԿ անդամ Վլադիմիր Սարկիսյանը:
Ի դեպ, Դարանակում ընտրությունները պետք է անցկացվեին դեռ փետրվարի 27-ին, սակայն թեկնածուները ընտրություններին մասնակցելու հայտ չէին ներկայացրել, ինչի արդյունքում ընտրությունների օրը հետաձգվել էր մինչև մարտի 6-ը:
Մեր այն հարցին, թե ստեղծված իրավիճակը ինչի՞ արդյունք է` գյուղապետը պատասխանեց. «Ես գտնում եմ, որ մեր Սահմանադրության հոդվածներում և Ընտրական օրենսգրքում կան հակասություններ: Եթե Ընտրական օրենսգրքով ընտրելու իրավունք ունի մեկ տարի փաստացի տվյալ բնակավայրում ապրող, հաշվառման մեջ գտնվող բնակիչը, ապա Սահմանադրությունն ասում է, որ մարդիկ իրավունք ունեն ազատ տեղաշարժվելու ցանկացած օր, ցանկացած ժամի և իրավունք ունեն ընտրություններին մասնակցել: Հետևաբար ես կարծում եմ, որ մեր` Հայաստանի Հանրապետության Սահմանադրության և Ընտրական օրենսգրքի մեջ հակասություններ կան: Եթե իմ կարծիքը, ինչ-որ մի տեղ անցնում է, ես գտնում եմ, որ մեկ տարվա գրանցումը մի քիչ շատ է: Ավելին ասեմ` ես գյուղապետ առաջադրվելու ցանկություն էլ չունեի, ինչի արդյունքում ընտրությունները հետաձգվում էին: 67 հազար դրամը այնքան էլ մի մեծ գումար չի, որ ձգտես գյուղապետի պաշտոնին: Հատկապես, որ մեծ բնակչություն չունեցող գյուղ է և եկամուտներ չունի: Սակայն այդ ընթացքում, երբ համապատասխան թեկնածուներ չեղան և ոչ ոք չառաջադրվեց, ժողովրդի ցանկությամբ, ժողովրդի կամքով որոշ մարդիկ դիմեցին ինձ, և ես երկրորդ անգամ առաջադրեցի իմ թեկնածությունը»:
Վլադիմիր Սարկիսյանին ասացինք, թե այնպիսի տպավորություն է ստեղծվում, որ նա չի ցանկանում դառնալ գյուղապետ, սակայն որոշ ուժեր իրեն ստիպում են գնալ այդ քայլին, ինչպես նաև հետաքրքրվեցինք, թե հանրապետական վերնախավը իր կուսակիցներից ո՞ր թեկնածուին է առավելությունը տալիս` իրե՞ն, թե՞ Վահան Մարգարյանին, ինչին ի պատասխան ավելացրեց. «Եթե ցանկություն չունենայի, չէի առաջադրվի: Չեմ կարող ասել, թե ում են առավելությունը տալիս, որովհետև մենք` երկու թեկնածուներս «Հանրապետական» կուսակցության անդամ ենք: Իսկ «Հանրապետական» կուսակցությունը, ըստ իմ ունեցած տեղեկությունների, ոչ ոքիս էլ առավելությունը չի տվել: Հայկական խոսք կա. ասում է` իրենց գյուղի ժողովուրդը թող որոշի, և թող իրենք իրենց յուղի մեջ տապակվեն: Փաստացի մի բան ասեմ` քրոջս հարսը, քրոջս ամուսինը ընտրության չեն մասնակցել` քվեաթերթիկ չլինելու պատճառով: Այս բաները ձեզ ասում եմ միայն ու միայն այն պատճառով, որ իմ կողմնակիցներն էլ են դուրս մնացել քվեաթերթիկ չլինելու պատճառով: Չմասնակցածների 70-80 տոկոսը դրանք իմ կողմնակիցներն են եղել: Ավելին ասեմ` 3 ձայնը գործող գյուղապետի համար շատ քիչ է: Դրա համար նոր ընտրություններում հուսով եմ` ամենաքիչը գոնե 20 տոկոս առավելություն կունենամ»:
Գյուղապետի մյուս թեկնածուն` կրկին հանրապետական Վահան Մարգարյանը մեզ հետ զրույցում նշեց, որ նա ևս բողոքարկելու է ընտրության արդյունքները և ավելացրեց. «124 բուլետեն է եղել, այնինչ 181 ընտրող է եղել: Իմ ընտրողները եկել են, որ ընտրեն, սակայն ժամը 11.00-ին ընտրություններն ավարտված են եղել, քվեաթերթիկ չի եղել, որ ընտրեն»: Մեր այն հարցին, թե ով է այս ամենի հետևում կանգնած` նշեց, որ այդ հարցին չի կարող պատասխանել: Իսկ անկուսակցական Գյուլնազ Գրիգորյանը ավելացրեց, որ տոն օրերից հետո են բողոքարկելու ընտրության արդյունքները Սահմանադրական դատարան: «10 օրվա ընթացքում տարբեր շրջաններից 61 մարդ համայնքում կայծակնային արագությամբ գրանցվել են, և որոնք բոլորովին կապ չունեն գյուղի բնակիչների հետ: Ի՞նչ իրավունք ունի կողմնակի գյուղի բնակիչը մեր համայնքի ղեկավարին ընտրի», – նկատեց Գյուլնազ Գրիգորյանը: Այն հարցին, թե ո՞վ է ընտրակեղծիքների թիկունքում կանգնած` արձագանքեց .«Վահանն ու Վլադիմիրը, ես ոչ մի կեղծիք չունեմ արած, մարդ չեմ գրանցել, երկուսով` մարդը 30 մարդ են գրանցել` որին փողով, որին խաթրով»:
Մեզ հաջողվեց պարզել, որ գործող գյուղապետի վրա մի շարք դատական գործեր կան, հետևաբար ցանկանում է վերընտրվել, իսկ Վահան Մարգարյանին հովանավորում է ԱԺ հանրապետական պատգամավոր Սպարտակ Մելիքյանը, հետևաբար իր առաջադրած թեկնածուի հաղթանակը նրա համար պատվի հարց է: Բայց, ինչպես ցույց են տալիս զարգացումները, այս թեկնածուները իրենց «յուղով տապակվողը չեն», հետևաբար այստեղ պետք է անձամբ Սերժ Սարգսյանի մասնակցությունը: Հակառակ դեպքում, եթե նախկինում ընդդիմությունն էր «Հանրապետականին» մեղադրում ընտրակեղծիքի մեջ, հիմա հանրապետականը հանրապետականին է մեղադրում և այսպիսի մանր-մունր հարցերով անհանգստացնում Սերժ Սարգսյանին:
«Ժամանակ» օրաթերթ
