ՀՀ Ազգային ժողովի ՀՀԿ խմբակցության ղեկավար, Հայաստան-Իրան պատգամավորական բարեկամական խմբի ղեկավար Գալուստ Սահակյանը հոկտեմբերի 15-ին հանդիպել է Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Մոհամմադ Ռեիսիի հետ:
Ողջունելով դեսպանին՝ Գալուստ Սահակյանը հավաստիացրել է, որ ինչպես Իրանի նախորդ դեսպանները, պարոն Ռեիսին նույնպես ջերմության պակաս չի զգա Հայաստանում: Երկու հարևան երկրների ու ժողովուրդների միջև հազարամյակների ընթացքում ձևավորված ամուր կապերն ու պատմական-մշակութային ընդհանրություններն իրական հիմք ու խթան են քաղաքական, տնտեսական ու մշակութային հարաբերությունները էլ ավելի զարգացնելու համար: Երկու երկրների փոխգործակցությունը տարբեր ոլորտներում թեև տարեցտարի ավելի ու ավելի է ամրապնդվում ու զարգանում, բայց հարաբերությունների ակտիվացման հնարավորությունները շատ ավելի մեծ են ու հեռանկարային, և երկուստեք պետք է ամեն ինչ անել՝ դրանք կյանքի կոչելու համար:
ՀՀԿ խմբակցության ղեկավարը տեղեկացրել է, որ տարիներ շարունակ ինքը ղեկավարում է Հայաստան-Իրան բարեկամական խումբը, քաջատեղյակ է երկու երկրների քաղաքական ու տնտեսական հիմնախնդիրներին և միշտ կողմ է եղել ու ամեն ինչ արել՝ ամրապնդելու կառուցողական ու փոխշահավետ համագործակցությունը: Նա կարևորել է խորհրդարանական ու ժողովրդական դիվանագիտության դերը երկու երկրների արդյունավետ ու կայուն հարաբերությունների զարգացման գործում:
«Երկու երկրների ու ժողովուրդների՝ դարերով ձևավորված ավանդական կապերի ամրապնդման անհրաժեշտությունն էլ ավելի է մեծանում փոխշահավետ ռազմավարական ծրագրերի իրականացման տեսանկյունից: Մենք ցանկանում ենք, որ Իրանը շուտափույթ լուծի իր խնդիրները, քանզի ինչքան Իրանը կայուն լինի, այնքան մեր փոխհարաբերությունները ավելի կամրապնդվեն»,-ասել է Գալուստ Սահակյանը:
Իրանի Իսլամական Հանրապետության դեսպան Մոհամմադ Ռեիսին շնորհակալություն է հայտնել ջերմ խոսքերի և ընդունելության համար ու հավաստիացրել, որ երկկողմ հարաբերությունների զարգացման հեռանկարների մասին նույն տեսակետն ունեն նաև Իրանի իշխանությունները: Նա հույս է հայտնել, որ կիրականացվեն տնտեսական ոլորտի փոխշահավետ ռազմավարական ծրագրերը, որոնց հետ կապված խնդիրները հանգամանորեն կքննարկվեն միջկառավարական հանձնաժողովի առաջիկա նիստում, կհստակեցվեն ժամկետներն ու անելիքները: ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ Իրանի դեսպան Մոհամմադ Ռեիսին Գալուստ Սահակյանին ներկայացրել է Իրանի խորհրդարանի Իրան-Հայաստան բարեկամական խմբի նոր կազմը՝ փոխանցելով նաև խմբի անդամների՝ հայ գործընկերների հետ ակտիվ համագործակցելու պատրաստակամությունը:
Հանդիպման ժամանակ քննարկվել են նաև խորհրդարանական համագործակցությանը, քաղաքական ու տնտեսական հարաբերություններին ու տարածաշրջանային խնդիրներին վերաբերող այլ հարցեր:
