«Մարտի 1»-ի իրադարձությունների համատեքստում ճնշումների էին ենթարկվել լրատվամիջոցները, դրանից հետո նման դեպքեր չեն եղել: «Առաջին լրատվական»-ի հետ զրույցում այս մասին ասաց Երևանի մամուլի ակումբի նախագահ Բորիս Նավասարդյանն՝ անդրադառնալով Հայաստանում խոսքի ազատության թեմային:
Ըստ նրա՝ Հայաստանում խոսքի ազատության աստիճանը բարձրացել է, բայց բարձրացել է տեխնոլոգիաների զարգացման, ինտերնետի տարածման շնորհիվ և շնորհիվ այն բանի, որ մարդիկ կարողանում են օգտագործել այդ նոր տեխնոլոգիաները, որպեսզի իրենց ասելիքը, իրենց կարծիքները տեղ հասցնեն: Սակայն պետության քաղաքականությունն այս ոլորտում, Նավասարդյանի համոզմամբ, առանձնապես մեծ առաջընթաց չի ապրել:
«Միգուցե որոշ չափով որակապես տարբերվում էր հեռուստաընկերությունների կողմից խորհրդարանական ընտրությունների լուսաբանումը, երբ չեն ստեղծվում անհավասար պայմաններ տարբեր քաղաքական ուժերի և թեկնածուների համար՝ այն, ինչ մենք արձանագրում էինք նախորդ համապետական ընտրությունների ժամանակ»,- պարզաբանեց Երևանի մամուլի ակումբի ղեկավարը:
Խոսելով 2008 թ. մարտյան դեպքերի օրերին հայտարարված արտակարգ դրության ընթացքում լրատվամիջոցների աշխատանքից՝ Նավասարդյանն ասաց, որ լրատվամիջոցները որոշակի ճնշումների ենթարկվեցին, ոչ օրինական գրաքննություն իրականացվեց: Սակայն, ըստ նրա, այդպիսի դեպքեր դրանից հետո չեն եղել:
Հիշեցնենք, որ օրեր առաջ ԲՀԿ-ական պատգամավոր, ՀՀ ԱԳ նախկին նախարար Վարդան Օսկանյանն իրեն պատգամավորական անձեռնմխելիությունից զրկելու վերաբերյալ ֆեյսբուքյան էջում գրել էր. «Խոսքը միայն իմ անձեռնմխելիության մասին չէ. այսպիսով վտանգվում է խոսքի ազատության անձեռնմխելիությունը, ուստի և վերաբերում է մեր ամբողջ հասարակությանը: Սա ոչ թե իմ գաղափարների և սկզբունքների մասին է, այլև բոլորիս համոզմունք ունենալու և այն արտահայտելու իրավունքի մասին է»:
