«Օրինաց երկիր» կուսակցության նախագահ Արթուր Բաղդասարյանի գլխավորությամբ հոկտեմբերի 12-ին տեղի է ունեցել կուսակցության քաղաքական խորհրդի հերթական նիստը:
Կուսակցության լրատվական ծառայությունից հայտնում են, որ քաղխորհուրդը քննարկել է Ազգային ժողովում «Օրինաց երկիր» խմբակցության օրինաստեղծ գործունեության մասին խմբակցության ղեկավար Հեղինե Բիշարյանի հաշվետվությունը: Ըստ այդմ, Ազգային ժողովի աշնանային նստաշրջանում «Օրինաց երկիր» խմբակցությունը շրջանառության մեջ է դրել 19 օրենքի նախագիծ:
ՕԵԿ Քաղխորհուրդը առանձնակի կարևորել է «Օրինաց երկիր» խմբակցության կողմից շրջանառության մեջ դրված «Արտոնագրային վճարների մասին» ՀՀ օրենքում փոփոխություն կատարելու մասին օրենքի նախագծի ընդունումը, որը պայմանավորված է արտոնագրային վճարներ վճարող ֆիզիկական անձանց, անհատ ձեռնարկատերերի, իրավաբանական անձանց և այլ տնտեսվարողների շրջանակը ավելացնելու հետ: Ըստ կուսակցության նախընտրական և գործունեության ռազմավարական ծրագրի առաջնահերթությունների` ՕԵԿ-ը ծրագրում է օրենսդրական բարեփոխումների միջոցով խթանել փոքր, գերփոքր տնտեսվարող սուբյեկտների, ինչպես նաև տարբեր տնտեսական գործունեություն ծավալող ֆիզիկական և իրավաբանական անձանց զարգացումը: 2010 թվականի դեկտեմբերի 28-ին «Օրինաց երկիր» խմբակցության համահեղինակությամբ ընդունված «Արտոնագրային վճարների մասին» օրենքը տասնյակ հազարավոր քաղաքացիների հնարավորություն ընձեռեց իրենց գործունեությունը ծավալել` վճարելով արտոնագրային վճարներ, ինչը զերծ է պահում նրանց հարկային մարմինների կողմից պարբերաբար իրականացվող ստուգումներից և հաշվապահական լրացուցիչ գործունեություն ծավալելուց: Ըստ վիճակագրական տվյալների` արդեն իսկ կան շուրջ 30 հազար արտոնագրային վճարներով գործունեություն ծավալողներ, վերջին մեկուկես տարում սա լուրջ ցուցանիշ է և անհրաժեշտություն է առաջացել 6 մլն դրամ տարեկան շրջանառության շեմը փոխարինել 8 մլն դրամի:
Քաղխորհուրդը քննարկել է նաև խմբակցության կողմից Ազգային ժողովում շրջանառության մեջ դրված «Պետական օժանդակության ուսումնական վարկերի մասին» օրենքի նախագծի ընդունումը, որը հնարավորություն կտա, որ խելացի, բայց բավարար ֆինանսական միջոցներ չունեցող երիտասարդների համար պետության աջակցությամբ ներդրվի երկարաժամկետ, ցածր տոկոսադրույքով կրթության վարկավորման համակարգ, ինչը հնարավորություն կտա ուսանողին ստանալ մատչելի և երաշխավորված կրթություն:
ՕԵԿ քաղխորհուրդը, ի թիվս այս հարցերի, քննարկել է ներքաղաքական, ինչպես նաև արտաքին քաղաքական խնդիրներին վերաբերող հարցեր:
