Ադրբեջանական Modern.az պորտալին տված հարցազրույցի ժամանակ Ադրբեջանի նախկին նախագահ Հեյդար Ալիևի նախկին օգնական, քաղաքագետ Էլդար Նամազովն անդրադարձել է Ադրբեջանում նավթի արդյունահանման կտրուկ անկման վերաբերյալ բրիտանական British Petroleum ընկերությանը նախագահ Իլհամ Ալիևի հնչեցրած մեղադրանքին.
«British Petroleum-ը մեղավոր չէ Ադրբեջանում նավթի արդյունահանման անկման համար: Նավթի արդյունահանման կտրուկ անկումն ընթանում է նախապես ընդունված պլանի համաձայն: Նավթային «Դարի պայմանագրի» կնքումից (1994) հետո մշակվել է հատուկ պլան, որով նախատեսվում էր, որ նավթի արդյունահանումը որոշ ժամանակ աճելու է, հասնելու է իր գագաթնակետին, որոշ ժամանակ մնալու է այդ մակարդակին, ապա սկսելու է գահավիժել:
Մի քանի տարի առաջ ադրբեջանական ղեկավարությունը հպարտորեն հայտարարում էր նավթի արդյունահանման 25 տոկոսանոց աճի մասին: Դա աննախադեպ ցուցանիշ էր, սակայն դա տեղի էր ունենում նախապես պատրաստված պլանի համաձայն: Ադրբեջանի ղեկավարությունը քաջատեղյակ է, որ նավթի արդյունահանումը հետագայում նույնպես անկում է ապրելու՝ մինչև չհասնի 1 տոկոսի: Այստեղ որևէ զարմանալի բան չկա:
Ադրբեջանական իշխանությունների և British Petroleum ընկերության միջև ծնունդ առած վեճը չունի քաղաքական ենթատեքստ: Իմ կարծիքով՝ լուրջ տարաձայնություններ չկան, և կշարունակվի British Petroleum-ի հետ Ադրբեջանի համագործակցությունը: Այստեղ դեր են խաղում ոչ թե քաղաքական, այլ՝ հոգեբանական գործոնները:
Ադրբեջանի ղեկավարությունը ստիպված է հասարակությանը պարզաբանել, թե ինչու է նավթարդյունահանումը, որը 3-4 տարի առաջ աճել էր 25 տոկոսով, այժմ զգալիորեն անկում ապրում: Դրա համար էլ ես ճիշտ չեմ համարում մեղքը բրիտանական ընկերության վրա բարդելը»:
Հիշեցնենք, որ նախորդ տարվա մայիսի սկզբներին բրիտանական The Economist պարբերականը գրել էր, որ ադրբեջանական նավթի պաշարները կարող են սպառվել արդեն 2028 թվականին:
