Հանրապետական կուսակցությունը երեկ գործկոմի նիստ է հրավիրել, որի ընթացքում, ինչպես հայտարարվել է պաշտոնապես, քննարկվել են ներկուսակցական, նախագահի թեկնածու առաջադրելու նպատակով արտահերթ համագումարի հրավիրման հարցեր: Սակայն այս պաշտոնական հայտարարություններից դուրս, ՀՀԿ գործկոմի նիստը հետաքրքրական է նրանով, որ տեղի է ունեցել անմիջապես Հայաստանում ԱՄՆ դեսպան Ջոն Հեֆերնի հայտնի հայտարարության և Գագիկ Ծառուկյանի հետ նրա հանդիպման հաջորդ օրն իսկ: Այսինքն՝ չի բացառվում, որ ՀՀԿ գործկոմի նիստի բուն դրդապատճառը կամ առիթը եղել է հենց ԱՄՆ դեսպանի տված կոշտ գնահատականը Օսկանյանի գործին և նաև հանդիպումը, ըստ էության՝ ջերմ հանդիպումը Գագիկ Ծառուկյանի հետ, համենայն դեպս՝ պաշտոնական հաղորդագրության մակարդակում արձանագրված ջերմության մասով:
Անշուշտ, ՀՀԿ-ն չէր կարող այս զարգացումներն աչքաթող անել, քանի որ խոսքը բավական արտառոց ֆորմատի մասին է՝ ԱՄՆ դեսպան – Ծառուկյան: Ծառուկյան, որը գրեթե հանդիսանում է Ռուսաստանի և Բելառուսի ոչ պաշտոնական դեսպանը Հայաստանում: Այս իմաստով նույնիսկ կարելի է ասել, որ ՀՀԿ գործկոմի նիստը, ըստ էության, հաստատում է նախօրեին մեր արած կանխատեսումն այն մասին, որ Հայաստանում ԱՄՆ դեսպանի և Ծառուկյանի հանդիպումը կարող է դառնալ նոր քաղաքական իրավիճակի, նոր զարգացումների սկիզբ: Այստեղ, բնականաբար, մարտահրավեր կա ՀՀԿ-ի համար, որովհետև եթե մինչ այս ՀՀԿ-ն իրեն համարում էր, այսպես ասած, Արևմուտքի կողմից ապահովագրված ուժ, ապա Ծառուկյանի և Հեֆերնի հանդիպումը ցույց տվեց, որ դա այդքան էլ այդպես չէ:
Չի բացառվում, որ այս իրավիճակից փորձել է օգտվել նաև Սերժ Սարգսյանը և հանդիպման փաստից առանց այդ էլ որոշակիորեն ճնշված ու շոկի մեջ ՀՀԿ-ականներին ճնշել իր հերթին և ներկայացնել իր համար անհրաժեշտ պահանջներ, անել դիտողություններ: Այլ կերպ ասած՝ ԱՄՆ-ԲՀԿ ֆորմատի հանդիպումը Սերժ Սարգսյանը փորձել է օգտագործել տաք-տաք և այդ տաք-տաք ծեծած երկաթով մի փոքր ՀՀԿ-ն ծեծել, ինչը նրան չէր խանգարի նախագահական ընտրություններից առաջ կուսակցության մեջ սանձերը ձգած պահելու տեսանկյունից:
Առավել ևս այժմ, երբ այնպիսի նախանշաններ են, որ Արևմուտքը պատրաստ է աջակցել հակառակ՝ ԲՀԿ-ական բևեռին, որտեղ կարող է տեղի ունենալ կոնսոլիդացիոն գործընթաց, Սերժ Սարգսյանի համար չափազանց կարևոր է բռի մեջ պահել ՀՀԿ-ն՝ արտահոսք կամ առնետավազք թույլ չտալու և այդպիսով ներիշխանական հեղաշրջման վտանգ չառաջացնելու համար:
