Լոռու մարզի գլխավոր դատախազ Կարեն Շահբազյանի կարծիքով, Վանաձորը «Սիցիլիա» անունն է ստացել տեղացի լրագրողների «լավ» աշխատանքի շնորհիվ: Նրանց օպերատիվ աշխատանքի արդյունքում այստեղ կատարված հանցագործությունները արագ արձագանք են գտնում հանրապետությունում:
Արդյունքում, տպավորություն է ստեղծվում, որ Լոռին «ամենաանհանգիստն» է: «Առաջին լրատվականի» թղթակցի հետ զրույցում Կ. Շահբազյանը նշեց, որ այսօր Լոռիում չկան այն հանցավոր խմբերն ու խմբավորումները, որ ժամանակին կային: Կոռուպցիոն հանցագործությունների բացահայտման ցուցանիշով էլ մարզն առաջին տեղում է հանրապետությունում:
«Կենցաղային հողի վրա սպանություններ են տեղի ունենում,որ միշտ եղել ու լինելու են: Նախկին հանցավոր խմբերը ապօրինի անտառահատումներով զբաղվող, որ անտառը վերածել էին բիզնեսի, նման խմբեր ևս չունենք մենք: Առաջ ավտոշարասյուներով էին տեղափոխում, այժմ հայտնաբերվածը 8-10 խմ է լինում, ինչը ևս հայտնաբերվում ու կանխվում է»,-ասաց դատախազը: Վերջինիս կարծիքով, լոռեցիները վստահում են դատախազությանը, ու թեկուզ անանուն հայտնում են ապօրինի երևույթների մասին:
Հեռուստաեթերներից մեկում` հեռուստադիտողներից մեկը տեղեկացրեց, որ Վանաձորի Երգի պետական թատրոնում չարաշահումներ են կատարվում: Փաստն ստուգվեց, հարուցվեց քրեական գործ, մեղավորները դատապարտվեցին: