ԱՄՆ-ում նախընտրական վերջին փուլն է: Մինչև ընտրությունները մնում է ուղիղ 5 շաբաթ, և Սպիտակ տան ղեկավարի պաշտոնի թեկնծուները փորձում են անել ամեն հնարավորը, որպեսզի մինչ այժմ չկողմնորոշված քաղաքացիների ձայներն իրենց կողմը գրավեն:
Գործնականորեն բոլոր հեռուստաալիքներով և համացանցում ցուցադրվում են տեսանյութեր, որոնց հերոսները քննադատում են Բարաք Օբամային կամ Միթ Ռոմնիին:
Օբամային սատարող արհմիություններից մեկը երեքշաբթի թողարկել է տեսանյութ… մի մարդու մասնակցությամբ, որը Ռոմնիի առանձնատան մոտ աղբն է հավաքում,- հաղորդում է ИТАР-ТАСС-ը:
«Իմ անունը Ռիչարդ Հեյս է, և ես հավաքում եմ Միթ Ռոմնիի աղբը:- Ասում է աֆրոամերիկացին` նայելով տեսախցիկին: Մենք, այսպես, անտեսանելի մարդիկ ենք: Նա չի հասկանում, որ եթե մենք չհավաքեինք աղբը, դա կհանգեցներ մեծ խնդիրների մաքրության ոլորտում»:
Հեյսի խոսքով` ձեռքով 15-16 տոննա աղբը մաքրելը «որոշակի հետք է թողնում քո ֆիզիկական վիճակի վրա»: «Ես գիտեմ, որ երբ դառնամ 55 կամ 60 տարեկան, իմ առողջությունը քայքայված կլինի: Իսկ Միթ Ռոմնիին դա ընդհանրապես չի հետաքրքրում»,- ասում է տղամարդը:
Տեսանյութի հեղինակները հայտարարել են, որ սա Ռոմնիի ավելի վաղ արած սկանդալային հայտարարության պատասխանն է: Քաղաքական գործիչը հայտարարել էր, որ ընտրողների 47 տոկոսը կախված է կառավարությունից, նորմալ հարկեր չի վճարում և ամեն դեպքում կքվերակի Օբամայի օգտին: «Իմ առաջադրանքն այդ մարդկանց համար մտահոգվելը չէ: Ես երբեք չեմ կարողանա համոզել նրանց, որ նրանք պետք է անձնական պատասխանատվություն հանդես բերեն և ինքնուրույն մտածեն իրենց կյանքի մասին»,- ավելացրել է հանրապետականը:
Օբաման քննադատել էր Ռոմնիին` ասելով, որ ԱՄՆ նախագահը ամբողջ երկիրն է ներկայացնում և «պետք է աշխատի բոլորի, ոչ թե ոմանց համար»:
