Ռուսաստանի ԱԳՆ-ն անհեթեթություն է համարել Al-Arabiya հեռուստաալիքի տարածած այն տեղեկությունը, որ ռուս զինվորականները մասնակցել են հունիսի 2-ին սիրիական ՀՕՊ-ի կողմից թուրքական ինքնաթիռի ոչնչացմանը: Այս մասին հաղորդում է RIA Novosti-ն՝ վկայակոչելով Ռուսաստանի ԱԳՆ հայտարարությունը:
Ավելի վաղ Al-Arabiya-ն, վկայակոչելով գաղտնի փաստաթղթերը, հայտնել էր, որ սիրիական ՀՕՊ-ին թուրքական ինքնաթիռը խփելու գործում օգնել են Տարտուսում տեղակայված ռուսական ռազմաբազայի մասնագետները: Հեռուստաալիքը նաև հայտնել էր, որ թուրքական կործանիչի օդաչուները ոչ թե զոհվել են, այլ գերի են վերցվել Սիրիայի իշխանությունների կողմից:
«Անհարմար է անգամ մեկնաբանել այդ ամբողջ անհեթեթությունը, սակայն, ցավոք, ստիպված ենք: Al-Arabiya-ի նյութում հիշատակվում է ոչ միայն Ռուսաստանը, այլև Իրանը, Հըզբոլլահը, Քրդստանի աշխատավորական կուսակցությունը, Սիրիայի նախագահ Բաշար Ալ-Ասադը, ոմն սիրիացի բրիգադի գեներալ Բասամ: Այդ ոչ այնքան անմեղ ֆանտազիաները հիմնվում են հետախուզական տվյալների վրա, որոնք Al Arabia-ն ձեռք է բերել այդ թվում RIA Novosti գործակալության պաշտոնական կայքից: Կեղծարարության հեղինակները հոգ չեն տարել անգամ «գաղտնի ծրագրից» հեռացնել համապատասխան տարբերանշանը»,- ասվում է ԱԳՆ հայտարարության մեջ:
