Սեպտեմբերի 10-26-ը Երևանի թատրոնի և կինոյի պետական ինստիտուտի (ԵԹԿՊԻ) ուսումնական թատրոնը չեխ աշխարհահռչակ Կարել Չապեկի «Մայրը» ներկայացմամբ ելույթ է ունեցել «Բելայա Վեժա-2012, Կլասիկա պլյուս» թատերական փառատոնին ու ստացել «Հանդիսատեսի համակրանք» մրցանակը: Այս մասին լրագրողների հետ հանդիպմանը տեղեկացրեց ԵԹԿՊԻ ռեկտոր Արմեն Մազմանյանը, ում խոսքով՝ այս վուլգար իրականության մեջ մենք զգում ենք զգայականի կարիքը:
Մազմանյանը խոստովանեց, որ «բավական հոգնած փառատոն էր», որի ժամանակ «Մայրը» արժանացել է հանդիսատեսի բուռն ծափահարություններին, և որքան էլ զարմանալի է եղել՝ երիտասարդ տղաներն ու աղջիկները 20-25 րոպե չեն հեռացել ու դիտել են ներկայացումը:
«Ժյուրին երկար տանջվելուց հետո հասկացավ, որ «Հանդիսատեսի համակրանքը» պետք է մեզ տա, ստիպված բերեցին-տվեցին»,- կեսկատակ-կեսլուրջ հավելեց նա:
Ներկայացման բեմադրիչ, ՀՀ վաստակավոր արտիստ Լալա Մնացականյանն ուրախությամբ արձանագրեց ուսումնական թատրոնի վերածնման փաստը: «Եթե դու չունես ուսումնական թատրոն, ուրեմն ամեն բան անիմաստ է: Այն, ինչ ցանկացել ենք փորձել` ստացվեց»,- նշեց դերասանուհին:
Ինչ վերաբերում է ներկայացման ընտրությանը, ապա նա նկատեց, որ այդ գործը չի կորցնում իր արդիականությունը, քանի որ ամեն գնով «ոչ» է ասում պատերազմին:
«Մայրը» ներկայացման մեջ խաղում են Արմեն Մազմանյանի ղեկավարած կուրսի ուսանողները: Ներկայացումը պատրաստվել է 1,5 ամսում:
Լուսանկարը՝ PanARMENIAN Photo-ի
