Եկամտային հարկի անցումը գործատուների շրջանում կարող է նվազեցնել ծախսերը: Ինչպես այսօր Աղվերանում ընթացող «Եկամտային հարկի ներդրումը 2013թ. ընդառաջ կենսաթոշակային բարեփոխումներին» թեմայով երկօրյա կլոր սեղան-քննարկման ժամանակ հայտարարեց ՀՀ ֆինանսների փոխնախարար Վարդան Արամյանը, ներկայումս գործատուն երկու տեսակի հաշվետվություն է ներկայացնում, բայց «բոլորս էլ մարդ ենք, կարող ենք չնկատենլ, սխալներ գործել»: Օրենքն ասում է՝ եթե գործատուն ինքն է հայտնաբերում սխալը, չի տուգանվում, եթե հարկայինը՝ տուգանվում է: Հաջորդ տարվանից գործածության մեջ դրվող նոր համակարգը վրիպակի դեպքում կարմիր լույս է վառում, նաև աշխատատարությունն էապես կրճատվելու է երկարաժամկետ կտրվածքով:
Քաղաքացին 63 տարեկանից իրավունք է ձեռք բերում կենսաթոշակի անցնելու, բայց, Արամյանի խոսքով, դա պարտադիր չէ, և մարդը կարող է շարունակել աշխատել: Սակայն նա նշեց, որ պետությունը 63 տարեկանից հետո դադարեցնում է իր կողմից 5% վճարելու պարտավորությունը:
Եթե քաղաքացին վաղաժամկետ հեռանում է կյանքից, և ժառանգ չկա, կուտակված գումարները, որոնք, Արամյանի բնորոշմամբ, «մանր-մունր փողեր չեն», որոշվել է, որ եթե երեք տարվա ընթացքում ժառանգ ի հայտ չգա, դատական կարգով փողն անցնում է բյուջե, եթե ժառանգ հայտնվեց դրանից հետո և ապացուցեց, որ հարգելի պատճառով ժամանակին չի ներկայացել գումարը ստանալու, կրկին դատական կարգով փոխանցվում է նրան:
«Ռեֆորմները միշտ վտանգավոր բան են, ու եթե սպասենք մինչև ճգնաժամը անցնի, միշտ սպասելով մնալու ենք: Խոր և կտրուկ փոփոխությունների պետք է սպասել: Ցանկացած ռեֆորմ վտանգված է և ենթակա է տապալման: Ամենակարևոր դրայվը կյանքի մեջ մարդն է»,- ասաց Վ.Արամյանը՝ եզրափակելով, որ այսօր կենսաթոշակային բարեփոխումների առումով ամենամեծ մարտահրավերը տեղեկացվածությունն է, ինտերնետ հասանելիությունը, որ քանի դեռ հեռավոր գյուղերում հնարավորություն չունեն ազատորեն համացանցից օգտելու, գյուղապետարաններում կամ սպասարկման կենտրոններում նման հնարավորություն կընձեռվի տնտեսվարողներին:
Նշենք, որ կլոր սեղան-քննարկումը կազմակերպել են ՀՀ աշխատանքի և սոցիալական հարցերի, ֆինանսների նախարարությունները, ՊԵԿ-ը, «Կենսաթոշակային համակարգի իրազեկման կենտրոն» հիմնադրամը, ԱՄՆ ՄԶԳ կենսաթոշակային և աշխատաշուկայի բարեփոխումների ծրագրի հետ համատեղ:
