Խոսելով արաբական աշխարհում կատարվող իրադարձությունների մասին և գնահատելով դրա անդրադարձը Հարավային Կովկասի վրա` Վալերի Բրյուսովի անվան լեզվաբանական համալսարանի ռեկտոր Սուրեն Զոլյանը լրագրողների հետ հանդիպման ժամանակ նշեց, որ Հարավային Կովկասում նման վտանգի առջև կարող է կանգնել Ադրբեջանը:
Նրա գնահատմամբ, Հայաստանը և Վրաստանը ոչ այնքան պետականության, որքան մշակույթային առումով շատ ավելի ավանդական և կայուն են, քան թե Միջին Արևելքի նորաստեղծ պետությունները:
Զոլյանը նշեց, որ Հայաստանում հիմնական խնդիրը սոցիալական դժգոհությունն է, և սա կարող է որոշակի ազդեցություն ունենալ:
«Ինչքան էլ փորձես սոցիալական դժգոհությունը անտեսել, պետք է հասկանան, թե վերջիվերջո գոյություն ունի կրիտիկական աստիճան, այլևս հնարավոր չէ դիմակայել: Այսօր քաղաքական ուժերը պետք է գիտակցեն դա և այնպես անեն, որ սոցիալական խնդիրները լուծում ստանան»,-նշեց Սուրեն Զոլյանը:
Քաղաքագետի գնահատմամբ, Հայաստանում այսօր սոցիալական ամենամեծ խնդիրը օր օրի աճող գներն են և այն օլիգարխիկ քաղաքական համակարգը, որը վերանալու փոխարեն ավելի մեծանում և խորանում:
Զոլյանը նաև նկատեց` արաբական աշխարհում կատարվող դեպքերը վկայում են այն մասին, որ գոյություն ունեցող քարտեզը վերաձևելու պրոցեսներ են ընթանում, և այդ առումով Հայաստանը պետք է պատրաստ լինի, որպեսզի կարողանա լուծել Ղարաբաղի հարցը:
