Հայ ազգային կոնգրեսի երեկվա հանրահավաքին ներկա էր նաև «Ժառանգություն» կուսակցության ղեկավար կազմը՝ Րաֆֆի Հովհաննիսյանի ղեկավարությամբ: Ընդ որում` նրանք մասնակցեցին ոչ միայն հանրահավաքին, այլ նաև՝ երթին: ԱԺ «Ժառանգություն» խմբակցության ղեկավար Ստեփան Սաֆարյանը հանրահավաքից հետո պատասխանեց «Առաջին լրատվականի» հարցերին:
– «Ժառանգություն» կուսակցությունը` ղեկավար կազմով մասնակցեց Հայ ազգային կոնգրեսի հանրահավաքին: Ինչո՞վ էր սա պայմանավորված:
– Այսօր մարտի 1-ի տարելիցն է. երեք տարի է անցել այդ ողբերգական ոճրագործությունից: Եվ այն պահանջները, որոնք ի սկզբանե առաջադրված են եղել թե՛ մեր, թե՛ Հայ ազգային կոնգրեսի կողմից, ըստ էության, որևէ լուծում չեն ստացել, և իհարկե, այսօր առաջին հերթին տասը զոհերի հիշատակը հարգելու և միգուցե նաև մարտի 1-ից դասեր քաղելու, համաժողովրդական միասնություն կերտելու հարցում դրանք օգտագործելու օր է: Եվ բնականաբար, մենք ինչպես մարտի 1-ին ժողովրդի կողքին, ժողովրդի հետ միասին հավասարապես վերցրինք ռեժիմի բիրտ հարվածները, նույնկերպ շարունակելու ենք մնալ պահանջատերն այն հարցերի, որոնք այս տարիների ընթացքում իրենց արդարացի լուծումը չեն գտել:
– Այս երեք տարիների ընթացքում, Ձեր կարծիքով, ինչո՞ւ մարտի 1-ի ոճրագործության մեղավորները չեն պատժվել:
– Որովհետև մարտի 1 իրականացնողներն, ամենայն հավանականությամբ, իշխանության գլխին են, և իրենք իրենց չեն կարող պատժել:
– Հայ ազգային կոնգրեսի հաջորդ հանրահավաքներին ե՞ւս «Ժառանգությունը» մասնակցելու է, թե՞ միայն մարտի 1-ի տարելիցի հանրահավաքին եկաք:
– Մարտի 1-ի հետ կապված, բնականաբար, բոլորիս մասնակցությունը մի փոքր ավելի առարկայական է դառնում, բայց մյուս հանրահավաքների ժամանակ «Ժառանգություն» կուսակցության տարբեր անդամներ, ընդդիմադիր մեր համակիրները մշտապես եղել են և այսօր էլ կան հանրահավաքում:
– Այսինքն՝ համագործակցությունը Կոնգրեսի հետ նոր տեսք ստանալո՞ւ է:
– Շատ կուզենայինք, որ երկխոսությունը, համագործակցությունը նոր հիմք ու բանաձև ստանար և շատ ավելի լայն լիներ, քան նախկինում էր կամ այսօր կա:
– Իսկ արվո՞ւմ են քայլեր այդ ուղղությամբ:
– Ես կարծում եմ, որ պետք է անենք քայլեր:
– Մի փոքր՝ «Ժառանգության» խորհրդարանական գործունեության մասին. երկու օր է՝ չեք մասնակցում ԱԺ նիստերին. այս քառօրյան որոշել եք բոյկոտե՞լ, թե՞ վերադառնալու եք խորհրդարան:
– Մենք քառօրյային չենք մասնակցելու. պատճառաբանությունները նշված են մեր տարածած հայտարարության մեջ: Ինչ վերաբերում է մյուս քառօրյաներին, ապա ոչ միայն մասնակցության, այլ նաև դրա ձևի խնդիրները պետք է քննարկի «Ժառանգություն» կուսակցության խորհրդի ընդլայնված նիստը և համապատասխան որոշում կկայացնենք:
– Իշխանությունները կարծես թե մի տեսակ անտարբեր են ձեր բոյկոտի հանդեպ, կարծես՝ ոչինչ չի եղել:
– Իրենք անտարբեր են շատ ավելի մեծ խնդիրների հանդեպ, քան վեց պատգամավորի բացակայությունն է ԱԺ դահլիճում: Ինչպես պարոն Հովհաննիսյանն է բանաձևել, նրանց կազմած օրակարգը որևէ առնչություն չունի երկրի խնդիրների հետ` թե՛ արտաքին, թե՛ ներքին մարտահրավերների հետ: Նրանք անտարբեր են ժողովրդի ամենատարբեր խմբերի խնդիրների նկատմամբ, այնպես որ՝ վեց պատգամավորի բացակայության վերաբերյալ նրանց անտարբերությունը չի զարմացնի:
– Իսկ այդ դեպքում իմաստ ունի՞ բոյկոտը:
– Կան քայլեր, որոնք անկախ նրանից՝ ինչ հետևանքներ կհարուցեն, պետք է արվեն՝ ի նշան բողոքի: Ընդդիմությունն առանձնապես մեծ լիազորություններ ու հնարավորություններ չունի ԱԺ-ում: Իհարկե, խոսել, թե դրանից ԱԺ-ն քանդվելու է կամ լուծարվելու, չեմ կարծում իրատեսական սպասումներ են: Բայց մի բան ակնհայտ է՝ բողոքի գործողությունը` որպես այդպիսին, անկախ՝ ինչպես կընկալվի ու ինչ գնահատականի կարժանանա, պետք է արվեր:
