ՀՀ ԱԳՆ մամլո գրասենյակից «Առաջին լրատվական»-ին հայտնում են, որ սեպտեմբերի 24-ին Չեխիայում ՀՀ դեսպան Տիգրան Սեյրանյանը հանդիպել է Չեխիայի Հանրապետության տրանսպորտի նախարար Պավել Դոբեշի հետ:
Քննարկվել են տրանսպորտի բնագավառում հայ-չեխական հարաբերությունների զարգացմանն առնչվող հարցերի լայն շրջանակ։ Դեսպան Սեյրանյանը նշել է, որ առ այսօր կողմերի միջև ոլորտին առնչվող միայն մեկ միջազգային փաստաթուղթ է ստորագրվել՝ օդային տրանսպորտի մասին համաձայնագիրը, որին ի պատասխան պարոն Դոբեշը պատրաստակամություն է հայտնել քննարկումներ սկսելու տրանսպորտի բնագավառում համագործակցության մասին համաձայնագրի նախագծի շուրջ:
Այնուհետև, քննարկվել են ոլորտում, հատկապես` ճանապարհաշինության հատվածում չեխական ներդրումային կամ վարկավորման ծրագրեր իրականացնելու հնարավորությունները, մասնավորապես, Հյուսիս-Հարավ ճանապարհային միջանցքի հաջորդ փուլերի վարկավորման ծրագրերի վերաբերյալ:
ՀՀ դեսպանը չեխ նախարարի աջակցությունը խնդրել է նաև Պրահայի «Բուբեն» երկաթուղային կայարանի պատմական շենքի մի մասում «Չարիքի հնեաբանություն» ցեղասպանությունների ուսումնասիրման կենտրոնին տարածք հատկացնելու հարցում («Չարիքի հնեաբանություն» կենտրոնը Հոլոքոստի ուսումնասիրման հետ զուգահեռ ակտիվորեն զբաղվում է Հայոց ցեղասպանության ուսումնասիրման և միջազգային ճանաչման խնդիրներով), ինչին նախարարը արձագանքել է դրականորեն:
