ՀՀ ԱԳՆ մամլո գրասենյակից «Առաջին լրատվական»-ին հայտնում են, որ սեպտեմբերի 21-ին Մոսկվայի «Ռենեսանս Մոնարխ» հյուրանոցային համալիրի շքասրահում տեղի է ունեցել Հայաստանի Հանրապետության անկախության 21-րդ տարեդարձին նվիրված պաշտոնական ընդունելություն:
Միջոցառմանը մասնակցել են Ռուսաստանի Դաշնության բարձրաստիճան պաշտոնյաներ, ՌԴ-ում հավատարմագրված օտարերկրյա դիվանագիտական առաքելությունների և Մոսկվայում գործող միջազգային կառույցների ներկայացուցիչներ, ռուսաստանյան քաղաքական, հասարակական ու մշակույթի ոլորտի հայտնի գործիչներ, ինչպես նաև հայ համայնքի անվանի ներկայացուցիչներ:
Պաշտոնական հանդիսությանը բացման խոսքով հանդես է եկել ՌԴ-ում ՀՀ դեսպան Օլեգ Եսայանը: Անդրադառնալով ՀՀ անկախության տարիների առանցքային նվաճումներին` ՀՀ դեսպանը նշեց, որ, Հայաստանն այսօր արագընթաց տեմպերով շարժվում է առաջ և հանդիսանում է միջազգային հանրության վստահելի անդամ: Դեսպան Եսայանն ընդգծեց նաև, որ այս տարի լրանում է Հայաստանի Հանրապետության և Ռուսաստանի Դաշնության միջև դիվանագիտական հարաբերությունների հաստատման 20-ամյակը, ինչպես նաև Բարեկամության, համագործակցության ու փոխադարձ օգնության մասին պայմանագրի 15-ամյակը` ավելացնելով, որ վերջիններս նշանակալի իրադարձություններ են երկու պետությունների միջև գոյություն ունեցող բազմաշերտ հարաբերությունների շրջանակներում:
Ելույթով հանդես է եկել նաև ՌԴ արտաքին գործերի նախարարի տեղակալ Իգոր Մարգուլովը: Իր խոսքում անդրադառնալով հայ-ռուսական ռազմավարական և դաշնակցային հարաբերությունների առանցքային կետերին՝ նա ընդգծեց, որ Ռուսաստանն ու Հայաստանը նախորդ 21 տարիների ընթացքում անցել են փոխգործակցության փայլուն օրինակներով հարուստ ճանապարհ: Պրն. Մարգուլովը բարձր է գնահատել հայ-ռուսական հարաբերությունների ներկայիս մակարդակը՝ կարևորելով երկու պետությունների սերտ համագործակցությունը տարածաշրջանային և միջազգային մակարդակներում:
Պաշտոնական ընդունելությունը շարունակվել է համերգային ծրագրով: Ընդունելությանը զուգահեռ կազմակերպվել է նաև հայ ժամանակակից նկարիչների աշխատանքների ցուցահանդես:
