ՄԱԿ-ի Մարդու իրավունքների գծով գերագույն հանձնակատար Նավի Փիլայը Վրաստանի իշխանություններին կոչ է արել հետաքննել վրացական բանտերում կտտանքների և բռնությունների փաստերը: Այս մասին հաղորդում է rosbalt.ru-ն:
«Մենք կառավարությանը կոչ ենք անում երաշխավորել, որ մարդու իրավունքների բոլոր խախտումները և ոչ միայն նրանք, որոնք տեսագրություններում են երևում, մանրամասնորեն կուսումնասիրվեն և բոլոր մեղավորները պատասխանատվության կենթարկվեն»,- հայտարարել է Փիլայի ներկայացուցիչ Ռուպերտ Քոլվիլը, որի խոսքերը մեջբերել է ՄԱԿ-ի մամլո ծառայությունը:
Հիշեցնենք, որ այս շաբաթ հրապարակվեցին տեսանյութեր, որոնցում երևում է, թե ինչպես են կտտանքների ենթարկում Գլդանի թիվ 8 բանտի բանտարկյալներին: Արդեն ձերբակալվել են այդ հաստատության ղեկավարներից մի քանիսը:
Պաշտոնից հեռացվել է պատիժների իրականացման դեպարտամենտի ղեկավարը:
Վրաստանի ներքին գործերի նախարարը և Գլդանի բանտապետը նույնպես ազատվել են իրենց զբաղեցրած պաշտոններից:
