Ֆրանսիայի երգիծական Charlie Hebdo ամսագրում մարգարե Մուհամմեդի ծաղրանկարների հրապարակման դեմ բողոքող մոտ 100 եգիպտացիներ ցույց են անում Կահիրեում Ֆրանսիայի դեսպանատան շուրջը, հաղորդում է РИА Новости-ն:
Ուրբաթօրյա աղոթքից հետո դեպի դեսպանատուն է գնացել ցուցարարների անջատ և ոչ մեծ երկու խումբ, սակայն նախապես հսկող ոստիկանները նրանց թույլ չեն տվել միավորվել Ֆրանսիայի ներկայացուցչության մոտ:
Շատ բողոքողներ սև դրոշներ ունեն, միջազգային ահաբեկչական «Ալ-Քաիդա» խմբավորման ղեկավարների` ամերիկյան հատուկ ծառայությունների կողմից սպանված Ուսամա բեն Լադենի և ներկայիս ղեկավար Այման ազ Զավահիրիի նկարներով մի քանի պաստառ են տանում: Պաստառներից մեկի վրա հետևյալ գրությունն է. «Որտե՞ ղ եք դուք, իսկակա՛ն տղամարդիկ»: Հնչում են հակաֆրանսիական և հակաամերիկյան նշանաբաններ: Ցուցարարները համարում են, որ Մուհամմեդի հրապարակված ծաղրանկարները «սրում են միջկրոնական անհամաձայնությունը և նոր անկարգություններ են հրահրում Եգիպտոսում»:
Չնայած կազմակերպիչները հավատացնում են, որ ցույցը բացառապես խաղաղ բնույթ ունի` դեսպանատունը շրջապատված է ոստիկանության կրկնակի շարքով, շենքի հարևանությամբ կանգնեցված են ավտոմեքենաներ, դրանցում` հատուկ ծառայության զինվորներ:
Charlie Hebdo-ում հրապարակության և մուսուլմանների հնարավոր արձագանքի հետ կապված` Կահիրեում Ֆրանսիայի դեսպանատունը փակել է երկրի բոլոր ֆրանսիական դպրոցներն ու մշակույթի կենտրոնները:
Ներկայումս դեսպանատան մոտ ամեն ինչ խաղաղ է, ոստիկանության և ցուցարարների միջև բախում չի եղել:
