Սեպտեմբերի 23-ին Աբովյան քաղաքում քաղաքապետի ընտրությունների համար «Բարգավաճ Հայաստան» կուսակցության ղեկավար Գագիկ Ծառուկյանի փեսայի՝ Կարեն Գուլոյանի դեմ առաջադրվել է «Հազարապետ» մականվամբ Արտաշես Մեհրաբյանը: Կ. Գուլոյանը գործող քաղաքապետն է, իսկ Ա. Մեհրաբյանը եղել է «Աբովյան» հեռուստաընկերության հիմնադիրը և ղարաբաղյան պատերազմի տարիներին՝ «Դահրավ» ջոկատի հրամանատարը:
Իշխող ՀՀԿ-ն Աբովյանում թեկնածու չի առաջադրել: ՀՀԿ մամլո խոսնակ Էդուարդ Շարմազանովը մեզ հետ զրույցում ասաց, որ իրենք այդ հարցը չեն էլ քննարկել: Արդյոք այդպիսով ՀՀԿ-ն իր համերաշխությո՞ւնն է հայտնում Գագիկ Ծառուկյանին և չի ցանկանում Աբովյանում վիճարկել վերջինիս իշխանությունը: Հայտնի է, որ վերջին տասնամյակում Գ. Ծառուկյանը գրեթե բացարձակ իշխանություն ունի այդ քաղաքում: «Մենք համերաշխ ենք բոլոր քաղաքական ուժերի հետ, որևէ մեկի հետ կոնֆրոնտացիայի կամ պատերազմական այլ գործողությունների մեջ չենք: Մենք՝ որպես նախագահ Սարգսյանի քաղաքական թիմ, որպես Հայաստանի ամենաազդեցիկ քաղաքական կուսակցություն, միշտ էլ գնում ենք քաղաքական դիալոգների, քաղաքական համերաշխությունների: Դա չի վերաբերում միայն ԲՀԿ-ին, մենք բոլոր քաղաքական ուժերի հետ կարող ենք ունենալ միայն ու միայն գաղափարական տարաձայնություն»,- այսպիսի ընդհանրական պատասխան տվեց Է. Շարմազանովը:
Արտաշես Մեհրաբյանը նախօրեին «Ազատություն» ռադիոկայանին ասել էր, թե ինքը ուզում է Աբովյանը «հետ վերցնել»: Ումի՞ց է ուզում թեկնածուն Աբովյանը հետ վերցնել: «Եթե մենք այսօր տվեցինք Աբովյանը, վաղը տալու ենք նաև Հայաստանը: Նման բռնակալություն, որից մարդիկ վախենում են, իրենց իրավունքները չեն կարողանում պաշտպանել»,- խուսափողական պատասխան տվեց քաղաքապետի թեկնածուն: Իսկ ովքե՞ր են այդ բռնակալները հարցին թեկնածուն նորից խուսափողական պատասխան տվեց. «Ով ուզում է, թող իր վրա վերցնի: Եթե մենք այսօր տվեցինք Աբովյանը, վաղը տալու ենք նաև Հայաստանը»:
Աբովյանում թեկնածու չի առաջադրել նաև ՀԱԿ-ը: Այդ քաղաքում ՀԱԿ կառույցի ղեկավար Գրիգոր Ոսկերչյանը մեզ հետ զրույցում ասաց, թե եթե ինչ-որ մեկը պետք է առաջադրվեր, դա ինքը պետք է լիներ: Հիշեցնենք, որ Գ. Ոսկերչյանը 1991-999թթ. եղել է այդ քաղաքի քաղաքապետը: «Ես նման իրավիճակում, նման համակարգում առաջադրվելու և քաղաքապետ դառնալու բոլորովին ցանկություն չունեմ, որովհետև եթե գնում ես քաղաքը ղեկավարելու, ուզես, թե չուզես, պիտի աշխատես այս իշխանությունների հետ: Ես այն մարդը չեմ, ով կաշխատի այս համակարգի հետ»,- ասաց Գ. Ոսկերչյանը: Այդ դեպքում ո՞ւմ պետք է ընտրեն Աբովյանում ՀԱԿ-ի համակիրները: ՀԱԿ-ը վերջերս որոշակի համագործակցություն է սկսել ԲՀԿ հետ: Հնարավո՞ր է, որ դա նկատի ունենալով` Աբովյանում ՀԱԿ կառույցն իր համակիրներին հորդորի ընտրել Կ. Գուլոյանին: «Ո՛չ: Ոչ մի կոչ, ոչ մի հորդոր չի եղել: Ես որևէ մեկին չեմ ասել՝ ընտրեք այս թեկնածուին: Նույնիսկ ընտրություններին մասնակցել-չմասնակցելու կոչ էլ չի եղել»,- ասաց Գ.Ոսկերչյանը:
Ինչ վերաբերում է Արտաշես Մեհրաբյանին, ապա նրան Աբովյանում որևէ թեկնածու չի պաշտպանելու: Նա ինքնառաջադրվել է և գտնում է, որ պետք է քաղաքը փրկի անհասցե բռնակալներից:
– Այնուամենայնիվ, ինչո՞ւ առաջադրվեցիք իր աներոջ հզոր աջակցությունը վայելող Կ. Գուլոյանի դեմ:
– Իմ կարծիքով` իմ նման քաղաքապետ դեռ չի եղել, եթե, իհարկե, ես լինեմ: Իմ կենսագրությունը եթե նայեք, կտեսնեք, որ ընդհանուր գործի մասին ավելի շատ եմ մտածել, քան իմ սեփական գրպանի: Աբովյանում գոյություն ունեցող բռնակալության պայմաններում մարդիկ վախենում են և չեն կարողանում պաշտպանել իրենց իրավունքները: Դրանք փչացնում են քաղաքը: 37 տարեկան ծառը կտրում են ու տեղը խանութ են սարքում, այն դեպքում, երբ այդ խանութի կարիքն ընդհանրապես չկա: Կողքը 25 հատ խանութ կա, ու սարքում են ավելի մեծ խանութ: Այդ կինոյի շենքի դիմացի հատվածն ինձ համար սուրբ տեղ է եղել, որովհետև մեր հեղափոխությունը հենց այդ տեղից սկսեց: Մենք այդտեղ հավաքվում՝ միտինգներ էինք անում:
– Ովքե՞ր են կտրում ծառերը:
– Չգիտեմ, բայց կառուցապատման թույլտվությունը քաղաքապետն է տվել:
– Ձեր կարծիքով` ՀՀԿ-ն Աբովյանում ինչո՞ւ թեկնածու չառաջադրեց:
– Ես խիստ եմ կասկածում՝ դա հանրապետակա՞ն է, թե՞ կիսաբարգավաճ է: Իրենք շատ թույլ են: Կարող է, գիշերը բարգավաճ են, ցերեկը՝ հանրապետական: Կամ՝ հակառակը:
– Սկզբում Աբովյանում ցանկանում էր առաջադրվել նաև նախկին քաղաքապետ Կարապետ Իսրայելյանը: Աբովյանում ասում են, որ Գագիկ Ծառուկյանը նրան գումար է տվել, որ ինքնաբացարկ հայտարարի: Ձեր դեպքում էլ կարծիք կա, որ Դուք պարտքեր ունեք և առաջադրվել եք, որ գումար վերցնեք Ծառուկյանից: Եվ առաջադրվելով՝ Կ. Գուլոյանի համար արդար մրցակցություն եք ապահովում:
– Ես շատ եմ լսել այդ մասին: Մինչև անգամ մարդ կա, ուզում է դնի, որ իրեն Ծառուկյանը կանչի, հետը մի 5 րոպե խոսի: Մեր քաղաքը, տեսեք՝ ուր է հասել:
– Իսկ Ձեզ չե՞ն ճնշել, որ հանեք Ձեր թեկնածությունը:
– Ես այդպիսի հարցից վատ եմ զգում: Ճնշողները, վախեցնողները լավ գիտեն, թե ում ճնշեն, ում վախեցնեն: Ես 10-15 րոպե խոսացել եմ Ծառուկյանի հետ Գյումրիի ընտրությունից 2 օր առաջ: Ինձ ասել են, թե եթե Ծառուկյանն ուզենա, հետը կխոսե՞ս: Ասեցի մեծ սիրով: Հանդիպեցի Աբովյանի եկեղեցու մոտ: Ես գնացել էի այն նպատակով, որ համոզեմ՝ իր փեսայի թեկնածությունը հանի, հետո երբ սկսեցինք խոսել, հենց այդ պահին ինձ մոտ ավելի լավ միտք առաջացավ: Ասեցի, պարոն Ծառուկյան, Գագո ջան, արի՝ դու ժողովրդին ասա, որ ունենք երկու թեկնածու: Եվ կոչ արա, հարգելի ժողովուրդ, դուք ում էլ ընտրեք, ես նրա հետ կաշխատեմ: Ասեցի՝ համ քո պրիստիժը կբարձրանա, համ էլ կտեսնես, թե ժողովուրդն ում է ուզում: Չհամաձայնեց:
– Իսկ նա չհորդորե՞ց, որ Դուք հանեք Ձեր թեկնածությունը, փոխարենը գումար առաջարկե՞ց:
– Ո՛չ, ո՛չ:
