Իբրև ամփոփում սումգայիթյան եղեռնագործության 23-րդ տարելիցի հիշատակին նվիրված միջոցառումների շարքի՝ փետրվարի 28-ին ԱՄՆ-ում ՀՀ դեսպանությունը, ԱՄՆ Ներկայացուցիչների պալատի հայկական խմբի համանախագահների, Վաշինգտոնում ԼՂՀ ներկայացուցչության, Ամերիկայի Հայկական համագումարի և Վաշինգտոնի Հայ Դատի գրասենյակի հետ համատեղ, ԱՄՆ Կոնգրեսում կազմակերպել էր Սումգայիթի և Բաքվի ջարդերի զոհերի հիշատակին նվիրված միջոցառում, որին ներկա էին ԱՄՆ մի շարք կոնգրեսականներ, Կոնգրեսի աշխատակազմի աշխատակիցներ, Հայ Առաքելական եկեղեցու հոգևոր հայրեր, բազմաթիվ ամերիկահայեր և ամերիկացիներ: Միջոցառմանը, որպես հիմնական բանախոս, ելույթ ունեցավ Լեռնային Ղարաբաղի ԱԳ նախարար Գեորգի Պետրոսյանը:
Միջոցառման ընթացքում ցուցադրվեց փաստավավերագրական կինոժապավեն
1988-ի փետրվարին Սումգայիթում և 1990-ի հունվարին Բաքվում ադրբեջանական իշխանությունների կողմից կազմակերպված՝ հայերի զանգվածային սպանությունների և տեղահանության մասին:
Միջոցառումը բացեց ԱՄՆ Կոնգրեսի հայկական խմբի դեմոկրատ համանախագահ Ֆրենկ Փալոնը, որն իր ելույթում դատապարտելով Սումգայիթի և Բաքվի կոտորածները՝ տեղի ունեցածը որակեց որպես ցեղասպանություն և կոչ արեց այս հարցում շարունակել աջակցությունը Հայաստանին ու Լեռնային Ղարաբաղին: ԱՄՆ-ում ՀՀ դեսպան Թաթուլ Մարգարյանը իր ելույթում կարևորեց ամերիկյան կոնգրեսականների բարձր հովանու ներքո այս միջոցառման անցկացումը: Դեսպանը ընդգծեց, որ ԱՄՆ Կոնգրեսի հայկական խմբի, Հայաստանի և Լեռնային Ղարաբաղի պաշտոնական ներկայացուցիչների և հայկական առաջատար կազմակերպությունների միասնական ջանքերը լավագույն գրավականն են՝ կանխելու Ադրբեջանի կողմից պատմության փաստերի վերանայման փորձերը:
Լեռնային Ղարաբաղի Հանրապետության արտգործնախարար Գեորգի Պետրոսյանը շեշտեց, որ եթե սումգայիթյան ողբերգությունը ժամանակին դատապարտվեր, թերևս, չլինեին դրան հաջորդած Բաքվի, Կիրովաբադի, Շահումյանի, Մարաղայի և այլ հայաբնակ շրջաններում տեղի ունեցած եղեռնագործությունները: Հայ ժողովուրդը հավատում է, որ հանցագործներն իրենց պատիժը կստանան և կդատապարտվեն մարդկության կողմից: Սումգայիթյան ոճրագործությունը իրենց ելութներում դատապարտեցին նաև կոնգրեսականներ Աննա Էշյուն, Էլիոթ Էնգելը, Ջեքի Սփիերը և ուրիշներ:
Միջոցառումն ավարտվեց Վաշինգտոնում Հայ Առաքելական եկեղեցու արևելյան թեմի ներկայացուցիչ, Ամերիկայի եկեղեցիների ազգային խորհրդի նախագահ Վիգեն արքեպիսկոպոս Հայկազյանի կողմից հնչեցված աղոթքով:
