ԱՄՆ դաշնային դատարանը պարտադրել է 7,2 մլն դոլարի փոխհատուցում տրամադրել popcorn-ի պատճառով առողջությունը վնասած Դենվերի բնակչին: Այս մասին հայտնում է INTERFAX-ը՝ հղում անելով հայցվորի փաստաբան Քեննեթ Մակլեյնին:
Ուեյն Ուոթսոնը popcorn արտադրող Gilster-Mary Lee Corporation-ի և King Soopers ու Kroger Company խանութների ցանցերի դեմ դատական հայց էր ներկայացրել, երբ 2007-ին հիվանդացել է «պոպկոռնային հիվանդությամբ»: Նա հոսպիտալացվել էր շնչառության դժվարացման գանգատներով:
Առողջության վատթարացման պատճառը քիմիական նյութն էր, որը ձևավորվում է արտադրանքը միկրոալիքային վառարանում տաքացնելու հետևանքով:
Ուոթսոնը խոստովանել է, որ գրեթե ամեն օր popcorn է կերել: Նրա խոսքով՝ ընկերությունները նրան չեն նախազգուշացրել հնարավոր վնասների մասին: Պատճառը դիացետիլի գոլորշին է: Դիացետիլը քիմիական նյութ է, որը լայնորեն կիրառվում է սննդի արդյունաբերության մեջ` որպես արոմատիզատոր:
Մեղադրվող կողմը հաստատում է, որ Ուոթսոնի առողջական խնդիրներն առաջացել են ոչ թե արտադրանքից, այլ մասնագիտական գործունեությունից. նա զբաղվում է գորգերի քիմմաքրմամբ:
