«Առաջին լրատվական»-ը արդեն տեղեկացրել է, որ շաբաթ գիշերը հարձակում էր տեղի ունեցել «Քեմփ Բեստիոն» բրիտանական բազայի ամերիկյան սեկտորի վրա, որտեղ գտնվում են նաև բրիտանացի, դանիացի, էստոնացի և աֆղան զինծառայողներ: Արդյունքում 2 ամերիկացի զինծառայող է մահացել, ևս 5-ը վնասվածք են ստացել:
Աֆղանստանի «Թալիբան» շարժման ներկայացուցիչը հաստատել է, որ ՆԱՏՕ-ի` Աֆղանստանի Գիլմենդ մարզում գտնվող ISAF-ի ռազմաբազայի վրա հարձակման հիմնական թիրախը այնտեղ ծառայող արքայազն Հարին է եղել: Շաբաթ նրա ծննդյան օրն է՝ փոխանցել է Sky News հեռուստաընկերությունը: Շարժման ներկայացուցիչները հայտարարել էին, որ մտադիր են սպանել արքայազն Հարիին: Կրակահերթի հետևանքով արքայազնը չի տուժել:
Ավելի վաղ բրիտանական և համաշխարհային ԶԼՄ-ներում քննարկվում էր տարբերակը, որ «Քեմփ Բաստիոն» ռազմաբազայի վրա հարձակման պատճառը սկանդալային ամերիկյան «Մուսուլմանների անմեղությունը» ֆիլմն է եղել:
Աֆղանստանում իրականացվող գործողություններին մասնակցում է հակաահաբեկչական կոալիցիայի բազմազգ կոնտինգենտը, որը ղեկավարում են ԱՄՆ զինված ուժերի ղեկավարության ներկայացուցիչները, ինչպես նաև ISAF կոնտինգենտը` ՆԱՏՕ-ի հրամանատարությամբ: Նրանց առաջադրանքն է «Թալիբան» շարժման և «Ալ-Քաիդայի» զինյալների հայտնաբերումը և ոչնչացումը:
ԶԼՄ-ների տվյալներով` 2012-ի սկզբից ի վեր Աֆղանստանում զոհվել է միջազգային ուժերի ավելի քան 200 ներկայացուցիչ: Միջազգային զորքի դուրսբերումն Աֆղանստանից նախատեսված է 2014-ի վերջին:
