Ինչպես ամեն ինչ` Հալեպում իրավիճակը նույնպես ունի սկիզբ և վերջ: Այս մասին «Առաջին լրատվական»-ի հետ զրույցում ասաց Բերիո Հայոց թեմի առաջնորդարանի բանբեր Ժիրայր Ռայիսյանը՝ անդրադառնալով Հալեպի իրավիճակին:
Վերջինս տեղեկացրեց, որ երեկ հայկական Նոր Գյուղ թաղամասում տեղի ունեցած բախումների արդյունքում շատ հայեր տեղափոխվեցին իրենց հարազատների և բարեկամների տները, ավելի ապահով շրջաններ, այդ թվում` Վիլլաներ: Սակայն, Ժ. Ռայիսյանի փաստմամբ, նրանք մի քանի օրով են գնացել, մինչև ամեն ինչ կարգավորվի:
«Ի վերջո` ամեն սկիզբ իր վերջն ունի. պետությունն ու բանակն այժմ այդ շրջանի մեջ են, ի վերջո` կհաստատվեն անդորր և բնականոն կյանք: Հուսանք, որ շուտ կլինի խաղաղությունը»,- հույս հայտնեց Ռայիսյանը:
Արձագանքելով այն տեղեկություններին, թե երեկ երեկոյան չորս հայ են սպանվել Սիրիայում՝ ասաց, որ երեկ սկսել են աշխատել այդ լուրերի հավաստիությունը պարզելու ուղղությամբ, սակայն չի հաջողվել: Ըստ նրա՝ կարծես իրականությանը չեն համապատասխանում այդ տեղեկությունները, որովհետև ոչ մի ազգային առաջնորդարան չի ներկայացել և ասել, որ իրենց հարազատներից մեկը մահացել է:
«Այնպես որ` կարծես թե լուրերն իրականությանը չեն համապատասխանում: Նույնիսկ հիվանդանոցներում ենք մեր աշխատանքները շարունակում, բայց մեզ տեղեկացրել են, որ իրենց մոտ նման դեպք չի գրանցվել»,- պարզաբանեց Ժիրայր Ռայիսյանը:
