«Ես կարծում եմ, եթե անձի վերքը ցավում է, անընդհատ ախ պիտի ասի, պիտի լաց լինի, կարծում եմ նման մոտեցումները ցավացող վերքին սպեղանի դնելու խնդիր ունեն»,- «Բարգավաճ Հայաստան» խմբակցության անդամ, նախկին արտգործնախարար Վարդան Օսկանյանին երեկ «Առաջին լրատվական»-ի հետ զրույցում այսպես հակադարձեց ՀՀԿ խմբակցության ղեկավար Գալուստ Սահակյանը:
Այնուհետև ՀՀԿ խմբակցության ղեկավարն ասաց. «Հանրապետական կուսակցությունը բազմաթիվ թեկնածուներ ունի հենց Գյումրիում՝ մեկը մյուսից ավելի, պարզապես մենք մեր սկզբունքներին հավատարիմ, զգալով, որ որոշակի համակրանք կա Սամվել Բալասանյանի նկատմամբ, փաստորեն պաշտպանեցինք Սամվել Բալասանյանին»:
Նշենք, որ «Ազատություն» ռ/կ-ի հետ զրույցում Վարդան Օսկանյանն ասել էր, թե Գյումրիում, որտեղ մայիսին կայացած խորհրդարանական ընտրությունների ժամանակ ԲՀԿ-ն ստացավ առավելագույն թվով ձայներ, ՀՀԿ-ն այլընտրանք չուներ, քան ԲՀԿ թեկնածուին աջակցելն էր: «Ես կարծում եմ, սա ՀՀԿ կողմից տակտիկական քայլ էր, այլընտրանք չունեին, ԲՀԿ թեկնածուն հաղթելու էր: Չուզեցան այնպես երևա, որ պարտվում են այդ քաղաքում, դրա համար էլ աջակցեցին [Բալասանյանին]»,- ասել էր Օսկանյանը:
ԲՀԿ ներկայացուցիչ Վարդան Օսկանյանը նաև հայտարարել էր, թե Գյումրիում ԲՀԿ հաղթանակը ցույց է տալիս, որ Հայաստանում առկա միակուսակցական համակարգը սկսել է զիջել իր դիրքերը: «Մեր խնդիրների, չարիքների հիմնական պատճառը քաղաքական մենաշնորհն է: Բոլոր մյուս խնդիրները, որոնք առօրյա մեր կյանքի վրա զգում ենք, տնտեսական մենաշնորհը, կոռուպցիան, չարաշահումները, անարդարությունը, հետևանք են այդ քաղաքական մենաշնորհի: Այս ՏԻՄ ընտրությունները գուցե սկիզբն էին իշխանության այդ տարաձուլման: Երկրորդ մեծ քաղաքում արդեն մի այլ կուսակցության ներկայացուցիչ է», – ասել էր Օսկանյանը:
«Եթե միակուսակցական համակարգ լիներ, Վարդան Օսկանյանը ելույթ չէր ունենա»,- մեզ հետ զրույցում հայտարարեց Գալուստ Սահակյանը՝ շարունակելով. «Հայաստանում միակուսակցական համակարգ չէ: Պարզապես Հայաստանում մեկ կուսակցություն կա, որ առավել ակտիվ է և վճռական, դա հանրապետական կուսակցությունն է: Քաղաքական մենաշնորհ կլիներ, եթե խորհրդարանը չունենար ընդդիմություն, չունենար երկրորդ մեծ խմբակցությունը, որը 30 տոկոս գրանցեց ընտրությունների արդյունքներում: Եթե 30 տոկոս ձայն ունեցող կուսակցության ներկայացուցիչը խոսում է քաղաքական մենաշնորհի մասին, ուրեմն ինքն իրեն դուրս է դնում իր հարազատ կուսակցությունից»:
