Amnesty International միջազգային իրավապաշտպան կազմակերպությունը Սաֆարովի գործի առնչությամբ տարածած հայտարարությունում մտահոգություն է արտահայտել ադրբեջանցի սպային ներելով՝ Բաքվի վտանգավոր ազդանշանի առնչությամբ: Բաքուն այդ քայլով ազդարարել է, որ հայերի նկատմամբ բռնությունները ոչ միայն ընդունելի են, այլև խրախուսվում են: Այս մասին հաղորդում է Asbarez-ը:
Կազմակերպությունը անհանգստություն է արտահայտել այն առնչությամբ, որ Սաֆարովի էքստրադիցիային հաջորդած Ադրբեջանի կառավարության գործողությունները կընկալվեն որպես էթնիկ հողի վրա իրականացվող բռնությունների խրախուսում, կսաստկացնեն ադրբեջանցիների և հայերի միջև առկա լարվածությունը: Կազմակերպությունը երկու երկրների կառավարություններին կոչ է արել հրապարակավ դատապարտել էթնիկ բռնությունները:
Կազմակերպության հայտարարությունում ասվում է, որ Ադրբեջանի կառավարությունը պետք է չեղյալ հայտարարի Սաֆարովին տված բոլոր արտոնությունները և հրապարակավ դատապարտի էթնիկ բռնությունները: Հայաստանի կառավարությունը ևս պետք է հայտնի, որ էթնիկ ադրբեջանցիների դեմ վրեժն անընդունելի է:
Հայ սպա Գուրգեն Մարգարյանին սպանելու համար Սաֆարովը Բուդապեշտի դատարանի կողմից ցմահ ազատազրկման էր դատապարտվել 2006-ին: Սաֆարովն ու Մարգարյանը 2004-ին մասնակցում էին ՆԱՏՕ-ի «Գործընկերությունը հանուն խաղաղության» ծրագրի շրջանակում անգլերենի դասընթացների: Սաֆարովը կացնահարել է Մարգարյանին այն ժամանակ, երբ նա քնած է եղել: Սաֆարովը նրա գլխին և պարանոցին 16 հարված էր հասցրել:
Սաֆարովը հայտնել էր, որ Մարգարյանը անարգել է իր երկրի դրոշը: Նա ափսոսանք է հայտնել, որ ավելի վաղ հնարավորություն չի ունեցել այլ հայերի սպանելու: Նա հայտնել է, որ վրեժ է լուծելու 1988-1994 թվականների Լեռնային Ղարաբաղի համար հակամարտության ժամանակ ադրբեջանցիների սպանության համար:
Հունգարիայի դատարանի կողմից ցմահ ազատազրկման դատապարվելուց հետո, Ադրբեջանի մարդու իրավունքների պաշտպան Էլմիրա Սուեյմանովան պատիժն անարդար էր որակել և հույս հայտնել, որ Սաֆարովին կարտահանձնեն հայրենիքին: Ադրբեջանական մամուլն էլ Սաֆարովի մասին հրապարակումներում նրան ներկայացրել էր որպես ազգային հերոս:
Օգոստոսի 31-ին Հունգարիայի կառավարութունը թույլ տվեց Սաֆարովին արտահանձնել Ադրբեջանին ՝ հայտնելով, թե Բաքվից երաշխիքներ է ստացել առ այն, որ Սաֆարովը կշարունակի իր պատիժը կրել Ադրբեջանում:
Բաքու վերադառնալով՝ Սաֆարովը ներման արժանացավ, մայորի կոչում և որպես փոխհատուցում՝ բնակարան ստացավ՝ բանտում անցկացրած 8 տարիների համար:
