Արիզոնայի դաշնային դատարանը թույլատրել է նահանգի ոստիկանությանը ստուգել կասկածելի անձանց փաստաթղթերը՝ համաձայն 2010 թ. ընդունված իմիգրացիայի մասին օրենքի: Այս մասին հաղորդում է Associated Press-ը:
Ակնկալվում է, որ ոստիկանությունը կարող է փաստաթղթերի ստուգումները սկսել արդեն մոտ ժամանակներս: Բացի այդ, դատարանը փաստաթղթից հանել է այն նորմը, որի համաձայն՝ անօրինական ներգաղթի մեջ կասկածվողին թաքցնելը նույնպես պետք է հետապնդվի:
Արիզոնայի նահանգապետ Ջեն Բրյուերը ներգաղթի մասին խիստ օրենքը ստորագրել է 2010 թ. ապրիլին, սակայն դրա կիրառումը մինչ այժմ անհնար էր փաստաթղթի հակառակորդների կողմից տարբեր ատյաններում ներկայացված բողոքների պատճառով:
ԱՄՆ Գերագույն դատարանը 2012 թ. հունիսին օրենքը, ընդհանուր առմամբ, ճանաչեց սահմանադրական, չնայած արգելափակեց դրա մի քանի կետեր: Մասնավորապես, դատարանն արգելեց ձերբակալություններ իրականացնել աննշան իմիգրացիոն հանցագործությունների համար, ինչպես նաև հրաժարվեց հանցագործություն համարել անօրինական ներգաղթյալի՝ աշխատանք ստանալը:
Գերագույն դատարանի որոշման մեջ նշվում էր, որ փաստաթղթի սահմանադրական լինելու վերաբերյալ վերջնական եզրակացություն կարելի է անել միայն այն բանից հետո, երբ այն որոշ ժամանակ կիրառվի:
Բարաք Օբամայի վարչակազմը հանդես է գալիս օրենքի դեմ՝ կարծելով, որ իմիգրացիոն հարցերը պետք է մնան դաշնային կառավարության տրամադրության տակ: Այդ հայցը Գերագույն դատարանը մերժել է:
