Վրաստանի նախագահ Միխեիլ Սաակաշվիլին Անակլիայում ծանոթացել է նոր հսկայական հյուրանոցային համալիրի շինարարության մանրամասների հետ: Շինարարությունը կիրականացվի հնդկական ներդրման հաշվին, հաղորդում է trend.az-ը:
Դրա առնչությամբ մի խումբ հնդիկ գործարարների և Վրաստանի էկոնոմիկայի նախարարության միջև համաձայնագիր է ստորագրվել: Ինչպես լրագրողներին հաղորդել է էկոնոմիկայի նախարար Վերա Կաբալիան, հնդիկ գործարարները վրացական կողմին վստահում են և հյուրանոցային համալիրի շինարարության մեջ ներդնելու են 10 միլիոն դոլար:
Միխեիլ Սաակաշվիլին, խոսելով այս նախագծի նշանակության մասին, ընդգծել է, որ Անակլիան այն վայրն է, որտեղ անհրաժեշտ է նման ենթակառուցվածք զարգացնելը: Նրա խոսքով` արդեն սկսվել է Լազիկա քաղաքի շինարարությունը, և Անակլիայում, որը նրա ենթադրյալ շարունակությունն է, 11 հիասքանչ հյուրանոց կլինի:
Ինչպես նշել է Սաակաշվիլին, Անակլիայում նոր հյուրանոցային համալիրի շինարարությունը կսկսվի ընթացիկ տարվա հոկտեմբերին: Շինարարությունում կաշխատի մի քանի հարյուր մարդ, իսկ հյուրանոցի բացումից հետո այնտեղ կաշխատի 150 մարդ:
