Պակիստանյան ոստիկանությունը ձերբակալել է իմամ Հաֆիզ Մուհամմեդ Խալիդ Չիշտիին, ով քրիստոնյա Ռիմշա Մասիհին մեղադրել էր Ղուրանն այրելու համար: Այս մասին հաղորդել է Agence-France Presse-ը: Ձերբակալության պատճառ է հանդիսացել իմամի օգնականի և երկու ականատեսների վկայությունն այն մասին, որ նա աղջկա պայուսակի մեջ դրել է Ղուրանի էջէր, որտեղ արդեն եղել են այրված թղթեր:
Գործակալության ներկայացմամբ` իմամը ձերբակալվել է սեպտեմբերի 1-ին, իսկ կիրակի օրը նա պետք է ներկայանա դատարան:
Ռիմշա Մասիհը ձերբակալվել էր օգոստոսի 16-ին աստվածանարգության կասկածանքով: Ավելի ուշ պարզվել է, որ նրա պայուսակում հայտնաբերել են այրված թղթեր, մոխիր և Ղուրանի էջեր:
Օգոստոսի 31-ին դատավորը երկու շաբաթով երկարաձգել է աղջկա կալանքը:
Ռիմշայի հարազատների փոխանցմամբ` աղջիկը 11 տարեկան է, սակայն բժիշկները եկել են այն եզրահանգման, որ նրա ֆիզիոլոգիական տարիքը մոտավորապես 14 է, իսկ նրա մտավոր տարիքը ֆիզիոլոգիականից ավելի ցածր է:
Պակիստանյան օրենսդրությունը խիստ պատիժ է սահմանում աստվածանարգության համար, ընդհուպ մինչև ցմահ բանտարկություն կամ մահապատիժ:
