Ախթալայի քաղաքապետի տան վրա ավազակային հարձակում կատարած Բոդոլը դեռ չի հայտնաբերվել (լուսանկարներ)

Լոռու մարզի Ախթալա քաղաքում երեկ կատարված միջադեպի առթիվ ուշ երեկոյան արդեն քրեական գործ էր հարուցվել ՝ քրեական օրենսգրքի 185 հոդվածի երրորդ մասի առաջին կետի հատկանիշներով և հետախուզում էր հայտարարվել՝ ավազակային հարձակման գործով որպես մեղադրյալ հանդիսացող Բոդոլ մականվամբ Արսեն Չիչյանի նկատմամբ: Վերջինս, ինչպես նաև նրա հանցակից՝ Ախթալային կից Շնող գյուղի բնակիչ Էդգար Հախվերդյանը, դեռևս չեն հայտնաբերվել: Նշենք, որ նրա բնակարանից հայտնաբերվել է հրազեն:

 Խաչիկյան եղբայրներն այս ամենը կապում են Ախթալայի լեռնահարստացման կոմբինատի նախկին տնօրեն, գործարար, «Մեթլ Փրինս» ընկերության սեփականատեր Սերոբ Տեր-Պողոսյանի կալանավորման հետ: Ըստ եղբայրների վարկածի՝ իրենց հայրական տան վրա ավազակային հարձակում կատարած անձինք, որոնցից Արսեն Չիչյանը, ի դեպ, կոմբինատի անվտանգության ծառայության պետն է հանդիսանում, Տեր-Պողոսյանի կալանավորման մեջ մեղադրում են հենց Խաչիկյան եղբայրներին:

 Հիշեցնենք, որ երեկ ավազակային հարձակում էր տեղի ունեցել Ախթալայի գործող քաղաքապետ, քաղաքապետի թեկնածու Հայկազ Խաչիկյանի հայրական տան վրա, բացի այդ՝ վնասել են վերջինիս Մերսեդես Բենս  մակնիշի ավտոմեքենայի ապակին: Հերքվել է վարկածը, թե իրականում կրակոցներ են եղել: Ավազակային հարձակում կատարած անձինք զինված են եղել մահակներով: Այդ պահին Խաչիկյանների բնակարանում ոչ ոք չի եղել:

Քիչ ավելի ուշ, իմանալով կատարվածի մասին, Խաչիկյան եղբայրներից ամենակրտսերը՝ Կարեն Խաչիկյանը, հորեղբոր որդու հետ ներխուժել են Արսեն Չիչյանի բնակարան, ծեծի ենթարկել վերջինիս տանն այդ պահին եղած 3 ընտանիքի անդամներին:

 Երեկ մինչև ուշ գիշեր ոստիկանության կողմից խիստ հսկողություն է իրականացվել Վանաձոր-Ալավերդի ավտոճանապարհին՝ Բոդոլին ու Էդգար Հախվերդյանին գտնելու ու բերման ենթարկելու համար, ինչպես նաև վերահսկվում են Լոռու և Տավուշի մարզի ճանապարհները, Բագրատաշենի անցակետը:

 Հավելենք, որ Հայկազ Խաչիկյանը չի կարծում, թե եղածը որևէ կերպ կազդի առաջիկա ընտրությունների վրա, չի բացառվում նաև այն վարկածը, թե կատարվածը քաղաքական ենթատեքստ ունի ու կապված է հենց համայնքապետի ընտրությունների հետ:

 Ի դեպ, Ախթալայում քաղաքապետի պաշտոնի համար պայքարում են նախկին ու ներկա քաղաքապետները՝ Սուրեն Թամազյանն ու Հայկազ Խաչիկյանը, երկուսն էլ Հանրապետական կուսակցության անդամ են:

 Շուշաննա Գրիգորյան, Լոռու մարզային թղթակից