Ռուսաստանը չունի անգամ հեքիաթային առիթ Վրաստանի տարածքում ինչ-որ գործողության իրականացման համար: Ինչպես երեկ «Ռուսթավի-2» հեռուստաընկերության եթերում հայտարարել է Վրաստանի Անվտանգության խորհրդի քարտուղար Գիգա Բոկերիան, Ռուսաստանի Դաշնությունը դեռ երեկ է տեղեկացված եղել Լոպոտի կիրճում ծրագրված հատուկ օպերացիայի մասին:
«Վրաստանը դիվանագիտական հարաբերություններ չունի Ռուսաստանի Դաշնության հետ: Մենք դեռ երեկ ենք հոգ տարել, որ մեր միջազգային գործընկերները տեղեկություն ունենան այդ դեպքերի մասին: Մենք այս մասին տեղեկացրել ենք Վրաստանում ԵՄ դիտորդական առաքելությանը, ինչպես նաև մեր ռազմավարական գործընկերներին: Մենք օգտվել ենք մեր ու ՌԴ-ի հարաբերությունների միջև առկա մեխանիզմներից: Ինչպես հայտնի է, Շվեյցարիայի դեսպանատունը ներկայացնում է Ռուսաստանի շահերը Վրաստանում և հակառակը»,- հայտարարել է Բոկերիան:
Լրագրողի այն հարցին ի պատասխան` կա՞ արդյոք վտանգ, որ Ռուսաստանը այդ դեպքը կօգտագործի հերթական «հակաահաբեկչական օպերացիայի» անցկացման համար, Բոկերիան հայտարարել է, որ Ռուսաստանը դրա համար ոչ մի հիմք չունի:
«Այդ վտանգի համար հիմքեր չկան, քանի որ այդ խումբը լիկվիդացվել է, ու մենք արել են ամեն ինչ խմբի բոլոր անդամներին ձերբակալելու համար: Ոչ մի «առիթ», անգամ հեքիաթային, Ռուսաստանի Դաշնությունը Վրաստանի տարածքում չունի: Դրա համար ես այդ վտանգը չեմ համարում իրական: Այն փաստը, որ դա տեղի է ունենում ռուսական սահմանի մոտ, հավելյալ գործոն է հատուկ ուշադրության համար, սակայն դա չի նշանակում, որ դա վտանգ է ներկայացնում Վրաստանի պետականության ու ինքնիշխանության համար»,- հայտարարել է Բոկերիան:
