Գլենդելի նախկին հայ բնակչին դատապարտել են 10 տարվա ազատազրկման` մասնավոր ավանդատուներից խարդախությամբ 5 մլն դոլար կորզելու համար: Կազմակերպված հանցավորության մյուս մասնակիցները` նրա եղբայրն ու ավանդային ծառայության աշխատակիցը, մոտ ժամանակներս կկանգնեն դատարանի առջև: Այս մասին հաղորդում է Glendale News Press-ը:
Ազատազրկումից բացի` դատավոր Վիրջինիա Ֆիլիպսը 44-ամյա Հենրիկ Սարդարյանիին պարտավորեցրել է իր գործողությունների հետևանքով տուժածներին վճարել 5,4 մլն դոլար և ևս 100 հազար դոլար` որպես տուգանք:
Հենրիկ Սարդարյանիին հունվարին ընդունել է վարկային խարդախության սխեմա կազմելու, մեքենայությունների, դավադրության, փողերի լվացման վերաբերյալ իր դեմ առաջադրված 5 կետից բաղկացած մեղադրանքը: Նրա 42-ամյա եղբայրը` Լոս Անջելեսի Սիլմար թաղամասի բնակիչ Համլետ Սարդարյանին, իրեն մեղավոր է համարել համանման մեղադրանքներում:
Դատարանը մեծացրել է Հենրիկ Սարդարյանիի պատժաչափը, քանի որ նրա սխեման լավ կազմակերպված է եղել. նա վարպետորեն ստեղծել է անշարժ գույքի կեղծ փաստաթղթեր, կեղծիքները թաքցնելու համար պետական կեղծ գրանցումներ:
Հենրիկ Սարդարյանին խոստովանել է, որ գումարը փոխառել է ավանդատուներից և ծրագրել դրանք այլևս չվերադարձնել, չնայած խոստացել է, որ նրանց գումարներն ապահով են: Նա նաև խոստովանել է, որ գումարն օգտագործել է ձիավազքի մրցումներում խաղադրույքներ դնելու համար:
Կեղծ գործարքների ժամանակ նա ցույց է տվել փաստաթղթեր` ապացուցելու, որ ինքը իբր Foremost Investment Properties ընկերության նախագահն է: Գումարները վերադարձնելու փոխարեն նա դիմել է ավանդային ծառայության աշխատակից Ուանդա Թենիին` գումարները նրա հոնգկոնգյան հաշվեհամարին փոխանցելու համար: Նա գումարները ծախսել է խաղամոլության վրա:
Համլետ Սարդարյանիի դատավճիռը հավանաբար կկայացվի սեպտեմբերի 10-ին, իսկ փողերի լվացման համար դավադրությանը մասնակցելու մեջ իրեն մեղավոր ճանաչած Թենիի նկատմամբ դատարանը վճիռը` հոկտեմբերի 15-ին:
