«Ցանկացած երկիր կանգնում է տարբեր վտանգների և մարտահրավերների առջև, նույնիսկ հզոր երկրներն ունեն խնդիրներ: Խնդիր ունի նաև Հայաստանը: Պետք է սովորենք արձագանքել այդ մարտահրավերներին»,- այսօր լրագրողների հետ հանդիպմանը ասաց Գլոբալիզացիայի և տարածաշրջանային համագործակցության կենտրոնի ղեկավար, քաղաքագետ Ստեփան Գրիգորյանը: Նա խոսեց «Արդի մարտահրավերներ. գերտերությունների շահերը տարածաշրջանում» թեմայի շուրջ:
Քաղաքագետն ուշադրություն հրավիրեց Հայաստան-Վրաստան հարաբերությունների վրա: Նա նկատեց, որ պարբերաբար ունենում ենք նաև խնդիրներ: Ըստ նրա՝ Հայաստանի արձագանքը բավական ճիշտ էր. «Նոր դեսպան նշանակվեց Հովհաննես Մանուկյանը: Ես հաճախ եմ լինում Վրաստանում, տեսել եմ, թե նոր դեսպանն ինչպես է աշխատում, ինչը շատ կարևոր է: Ես ինձ համար դա ֆիքսել եմ: Մի քանի օր առաջ կարդացի Ռուսաստանում գտնվող Ջավախահայերի միության հայտարարությունն այն մասին, որ նա ակտիվորեն աշխատում է Վրաստանի կառավարության հետ: Ես մեկ անգամ ևս համոզվեցի, որ դեսպանն ակտիվ և ճիշտ է աշխատում՝ առաջ քաշելով ջավախահայության խնդիրները: Եթե ՌԴ-ից բացասաբար արձագանքեցին, նշանակում է` դեսպանը ճիշտ է աշխատում»:
Քաղաքագետը զարմանալիորեն ներքին քաղաքական կյանքի մարտահրավեր համարեց երթևեկությունը: Նրա որակմամբ՝ Երևանում սա կարևորագույն խնդիր է, քանի որ ավտովթարներից զոհվածների թիվը չափազանց մեծ է, պետության մեջ երթևեկությունը պետք է կարգավորված լինի:
«Մարդկանց առողջությունը շատ կարևոր է. սա մարտահրավեր է, որը շատ կարևոր է, մարտահրավեր է` կապված ներքին քաղաքականության հետ»,- նկատեց Ստեփան Գրիգորյանը՝ հավելելով, որ սա թույլ չի տալիս զբաղվել այլ` ավելի կարևոր հարցերով:
Վերադառնալով արտաքին քաղաքական մարտահրավերներին՝ քաղաքագետը նշեց, որ Եվրասիական միություն ստեղծելու մասին խոսակցությունները ևս մարտահրավեր են: Բանախոսի համոզմամբ՝ դրա վերաբերյալ ևս քննարկում պետք է լինի, որպեսզի հասկանանք, թե մեզնից ինչ են ուզում: «Հնարավոր է` մեր շահերին համընկնի: Մենք ոչ ադեկվատ արձագանքում ենք նրան, ինչ չկա»,- նկատեց Ս. Գրիգորյանը:
Անդրադառնալով ԱՄՆ-ում կայանալիք ընտրություններին՝ քաղաքագետը նկատեց, որ ակնհայտ է հայ ժողովրդի սիմպատիան, ինչը, ըստ նրա, չպետք է երևա: Նրա կարծիքով՝ Հանրապետական վարչակարգը մեզ ավելի ձեռնտու է, քան դեմոկրատականը:
«Հանրապետական վարչակազմը միշտ զբաղվում է աշխարհի հարցերով, մեր տարածաշրջանում ձեռնտու է, որ շատ սուբյեկտներ լինեն: Դեմոկրատները փակվում են միայն իրենց հարցերով, իրենք ներսի հարցերով են զբաղվում: Հարավային Կովկասում պետք է ակտիվորեն աշխատի մի քանի սուբյեկտ:
Ամենածանրը այն կլինի, եթե այս տարածաշրջանում իշխի մեկ ուժ. այդ դեպքում կկրկնվի Ղարսի պատմությունը: Ռուսաստանը տարածաշրջանում ամրապնդվելու դեպքում, չեք հասցնի զարթնել, և կլուծվի Ղարաբաղի հարցը. Ռուսաստանը Ղարաբաղը կհանձնի Ադրբեջանին շատ արագ: Դա են թելադրում տարածաշրջանի խաղի կանոնները. այստեղ ՌԴ-ն պետք է խաղաղություն հաստատի` Ղարաբաղի հարցը լուծելով»,- մեկնաբանեց Ստեփան Գրիգորյանը:
