ԱԺ ՀՀԿ-ական պատգամավոր Մնացական Մնացականյանը Թալինի քաղաքապետի ընտրությունների ժամանակ սատարում էր անկուսակցական Վորոշ Խաչատրյանին, ու սա այն դեպքում, երբ իրենց կուսակցությունը պաշտոնապես սատարում էր մեկ այլ թեկնածուի: «Ժողովուրդ»-ի տեղեկություններով՝ այսքանից հետո ՀՀԿ-ում որոշել են Մնացականյանից վրեժխնդիր լինել, ու հիմա քննարկվում է նրան մանդատից զրկելու հարցը:
– Պարոն Մնացականյան, մեր տեղեկություններով` ՀՀԿ-ն Ձեզ ստիպում է, որպեսզի հրաժարվեք Ձեր մանդատից այն բանի համար, որ Դուք Թալինի քաղաքապետի ընտրությունների ժամանակ սատարել եք ոչ թե ՀՀԿ թեկնածուին, այլ նրա մրցակցին:
– Ուրեմն ինձ համար անհասկանալի է, թե ովքեր են տարածում այդ լուրերը: Դրանք հիմարություններ են, չգիտեմ ով ա ասում կամ ով չի ասում, տենց բաներ չկա իրականում: Ուրեմն, եթե տենց բաներ լինի, առաջինը դրա մասին Դուք կիմանաք, դե ով որ ասում ա, գլուխը պատին ա տալիս, եղա՞վ:
– Իսկ ինչպիսի՞ն են Ձեր փոխհարաբերությունները Ձեր հարազատ կուսակցության հետ:
– Ուրեմն դրանք արդեն անցած պատմություններ են, արդեն էլ ոչ մի բան չկա, թեմաները փակված են շատ վաղուց: Իսկ ես ե՞րբ եմ ՀՀԿ-ի հետ ընդհարված եղել, որ հիմա էլ պիտի հաշտվեմ: Չէ’, ամեն ինչն էլ նորմալ ա:
– Բայց տարաձայնություններ էին առաջացել Ձեր կուսակցության ղեկավարների և մարզպետի հետ այն բանից հետո, երբ Դուք հայտարարել էիք, որ ՀՀԿ-ի թեկնածուին չեք սատարելու:
– Դե արդեն ասել եմ, որ չէ, տարաձայնություններ չկան, ոչ, нет:
– Ըստ տեղեկությունների`Ձեր այդ որոշումից հետո ոչ միայն ստիպում են, որպեսզի Ձեր մանդատից հրաժարվեք, այլև Ձեր կնոջն են հեռացրել այն բուժկենտրոնից, որտեղ նա աշխատում էր, ճի՞շտ է:
– Դե հիմա կարող եք էդ հանողներից հարցնել, թե ինչու են հանել, ինչ պատճառով են հանել, բոլորն էլ գիտեն, որ հանել են, ազատվել ա աշխատանքից, հիմա չի աշխատում: Այո’, իրան հանել են աշխատանքից:
– Ի՞նչ պատճառաբանությամբ են Ձեր կնոջն ազատել աշխատանքից:
– Դե ես տեղյակ չեմ, պատճառները կարող եք գնալ, հանողներից ճշտել: Այդ կարգադրությունը գրողից հարցրեք:
– Ովքե՞ր են այդ կարգադրողներն ու հանողները:
– Ովքե՞ր են, գնացե’ք, իմացե’ք: Դե հիմա որ էդքան բանը ճշտել եք, գնացեք, էդքան բանն էլ ճշտեք:
– Մեր տեղեկություններով՝ Ձեր կնոջը ոչ միայն աշխատանքից են հեռացրել, այլև քրեական գործ են հարուցել…
– Հիմա մի հատ հարց տվեցիք, ասեցի ոչ, չկա նման բան, հիմա էլ սկսել ես ուրիշ հարցեր տալ, հարցազրույց վարել… Ոչ, չկա տենց բան: Չկա: Դուք ասում եք`Թալինից եք ստացել էդ տեղեկությունները, ես էլ ասում եմ, որ ես Թալինում նման բաներ չեմ լսել: Հաջողություն Ձեզ:
