Չինաստանը ցանկանում է, որ յուանը կիրառություն գտնի աշխարհի տարբեր տարածաշրջաններում` Լատինական Ամերիկայում և Մերձավոր Արևելքում, որոնք Չինաստան են մատակարարում երկրի կողմից ներկրվող նավթի 70 տոկոսը:
Չինաստանը ծրագրում է ընդլայնել իր արժույթի միջազգային կիրառությունը: Vedomosti-ն, հղում անելով Հոնգկոնգում ԱՄՆ դեսպան Դոնալդ Տոնին, հայտնում է, որ շուտով Մերձավոր Արևելքում և Լատինական Ամերիկայում կհայտնվեն յուանով առևտրային գործարքներ ապահովող ֆինանսական կենտրոններ: Մերձավոր Արևելքի երկրներից Չինաստանը գնում է ներկրվող նավթի 58%-ը, իսկ Լատինական Ամերիկայից` 10 տոկոսը: Ներկայումս յուանի օգտագործումը Չինաստանի սահմաններից դուրս օրենսդրությամբ արգելված է:
Լատինական Ամերիկայում Citigroup թրեյդինգի ղեկավար Օտմեն Գեմերոն վստահ է, որ չինական արժույթը պահանջարկ կունենա: Citigroup-ը խոշոր չինական ընկերությունների հետ քննարկում է այդ տարածաշրջանում յուանով հնարավոր առևտրային գործարքներին վերաբերող հարցեր: Լատինաամերիկյան երկրների հետ Չինաստանի առևտրաշրջանառությունը կազմում է 230 մլրդ դոլար, իսկ Մերձավոր Արևելքի հետ`240 մլրդ դոլար: Մյուս խոշոր գործընկերոջ` Ճապոնիայի հետ ( 344,9 մլրդ դոլար) հունիսին երկրներն անցել են իրենց արժույթների ուղղակի փոխանակման:
Սակայն յուանը միջազգային շրջանառության մեջ դնել հնարավոր կլինի միայն այն դեպքում, երբ երկրի Կենտրոնական բանկը անկախություն ձեռք բերի կառավարությունից: Այս մասին հայտնել է ԱՄՆ ֆինանսների նախարար Թիմոթի Գայթները: Արդեն մի քանի տարի է` ԱՄՆ-ն փորձում է դրան հասնել: